വടകര: തിരുവള്ളൂര് പഞ്ചായത്തിലെ കണ്ണമ്പത്ത്കര തുമ്പോളിമുക്ക് കാഞ്ഞിറോളി നമ്പ്യാര് വീടിന് സമീപം പുലിയെ കണ്ടതായി അഭ്യൂഹം. വനംവകുപ്പ് ഉദ്യോഗസ്ഥര് 
സ്ഥലത്തെത്തി പരിശോധന നടത്തി. തിങ്കളാഴ്ച രാത്രിയാണ് പുലിയോട് സാമ്യമുള്ള വന്യജീവിയെ കണ്ടത്. അയല്വാസികളായ രണ്ടു പേര് ഇതിനെ കണ്ടതായാണ് വിവരം. പുലിയാണെന്ന് വനംവകുപ്പ് സ്ഥിരീകരിച്ചിട്ടില്ലെങ്കിലും വന്യജീവിയുടെ സാന്നിധ്യമുണ്ടെന്നത് വ്യക്തമാണ്. റോഡിലൂടെയും സമീപ പ്രദേശങ്ങളിലൂടെയും 
സഞ്ചരിക്കുന്നവര് ജാഗ്രത പാലിക്കണമെന്ന് വനംവകുപ്പ് ഉദ്യോഗസ്ഥര് നിര്ദ്ദേശിച്ചു. രാത്രികാലങ്ങളില് ഒറ്റയ്ക്ക് പുറത്തിറങ്ങുന്നത് ഒഴിവാക്കണമെന്നും കുട്ടികളെ വീടിന് പുറത്തേക്ക് വിടുമ്പോള് പ്രത്യേകം ശ്രദ്ധിക്കണമെന്നും ബന്ധപ്പെട്ടവര് അറിയിച്ചു.
വന്യജീവിയെ കണ്ടതായ വിവരം ലഭിച്ച പ്രദേശത്തിന് സമീപമുള്ള ജനവാസ മേഖലകളിലും ജാഗ്രത ശക്തമാക്കുന്നുണ്ട്. സംഭവത്തിന്റെ പശ്ചാത്തലത്തില് പ്രദേശത്തെ മദ്രസയ്ക്കു ചൊവ്വാഴ്ച അവധി പ്രഖ്യാപിച്ചിട്ടുണ്ട്. വന്യജീവിയെ വീണ്ടും കാണുകയോ സാന്നിധ്യം 
സംബന്ധിച്ച് വിശ്വാസയോഗ്യമായ വിവരം കിട്ടുകയോ ചെയ്താല് വനം വകുപ്പിനെ അറിയിക്കണം, സ്വയം പിന്തുടരാനോ അടുത്തെത്തി പരിശോധിക്കാനോ ശ്രമിക്കരുത്.
കുമ്മങ്കോട് ഉള്പ്പെടെയുള്ള സമീപ പ്രദേശങ്ങളില് നേരത്തെ വന്യജീവി സാന്നിധ്യം സംബന്ധിച്ച് ആശങ്ക നിലനില്ക്കുന്നതിനിടെയാണ് തിരുവള്ളൂര് കണ്ണമ്പത്ത്കരയില് പുലിയെ കണ്ടതായ അഭ്യൂഹം.
