കോഴിക്കോട്: മുതിര്ന്ന സ്ത്രീകളുടെ സംരക്ഷണം സ്ത്രീസമൂഹം നേരിടുന്ന വലിയ വെല്ലുവിളിയെന്ന് സംസ്ഥാന വനിതാ കമ്മീഷന് ചെയര്പേഴ്സണ് അഡ്വ. പി.സതീദേവി. കോഴിക്കോട് കളക്ടറേറ്റ് കോണ്ഫറന്സ് ഹാളില് നടന്ന ജില്ലാതല സിറ്റിങ്ങില്
സംസാരിക്കുകയായിരുന്നു ചെയര്പേഴ്സണ്. പരിഗണിച്ച പരാതികളില് അധികവും കുടുംബവഴക്കുകളുമായി ബന്ധപ്പെട്ടവയാണ്. സ്വത്ത് വിഹിതം ലഭിച്ചതിനുശേഷം മുതിര്ന്ന സ്ത്രീകളെ കുടുംബത്തില് നിന്ന് പുറന്തള്ളുന്നു. സ്നേഹവും കരുതലും ലഭിക്കേണ്ട വാര്ധക്യത്തില് സ്ത്രീകള് വല്ലാത്ത ഒറ്റപ്പെടല് നേരിടുന്നുണ്ടെന്നും ഇത് സമൂഹത്തിന്റെ ആരോഗ്യത്തിന് നല്ലതല്ലെന്നും ചെയര്പേഴ്സണ് പറഞ്ഞു. സാമ്പത്തിക ഭദ്രതയുള്ള സ്ത്രീകള്ക്ക് പോലും വാര്ധക്യത്തില് സാമൂഹ്യപരിരക്ഷ കിട്ടുന്നില്ല. സ്ത്രീകള്ക്ക് എതിരെ സൈബര് ആക്രമണങ്ങള് കൂടുന്നു. ഒറ്റയ്ക്ക് താമസിക്കുന്ന സ്ത്രീകള് വലിയ സുരക്ഷാ ഭീഷണി നേരിടുന്നു. അച്ഛനും അമ്മയും വഴക്കിട്ട് കഴിയുന്ന വീടുകളിലെ കുട്ടികളില് കുടുംബ മൂല്യങ്ങളും സാമൂഹ്യ മൂല്യങ്ങളും കുറഞ്ഞ് വരുന്നുണ്ടെന്നും പുരുഷന്മാര് മദ്യവും മയക്കുമരുന്നും ഉപയോഗിക്കുന്നതുമൂലം സ്ത്രീകള്ക്ക് സ്വന്തം കുടുംബത്തില് നിന്ന് പോലും
സുരക്ഷാഭീഷണി നേരിടേണ്ടി വരുന്നുണ്ടെന്നും ചെയര്പേഴ്സണ് പറഞ്ഞു. ഗാര്ഹിക പീഡന നിരോധന നിയമവുമായി ബന്ധപ്പെട്ട കോടതി ഉത്തരവുകള് നടപ്പിലാക്കി കിട്ടാന് സ്ത്രീകള് നിയമപാലകരെ സമീപിക്കുമ്പോള് കുടുംബപ്രശ്നങ്ങള് എന്ന് പറഞ്ഞ് ലഘൂകരിച്ച് അവഗണിക്കുകയാണെന്നും ചെയര്പേഴ്സണ് കൂട്ടിച്ചേര്ത്തു. പരിഗണിച്ച 50 പരാതികളില് ആറെണ്ണം തീര്പ്പാക്കി. ഒരു പരാതി നിയമസഹായത്തിനായി വിട്ടിട്ടുണ്ട്. ആറു പരാതികളുമായി ബന്ധപ്പെട്ട് പോലീസിന്റെയും വകുപ്പ് ഉദ്യോഗസ്ഥരുടെയും റിപ്പോര്ട്ട് ആവശ്യപ്പെട്ടിട്ടുണ്ട്. ജില്ലാതല സിറ്റിങ്ങില് കമ്മീഷന് അംഗം പി.കുഞ്ഞായിഷ, അഡ്വ. എ.ജമിനി എന്നിവര് പങ്കെടുത്തു.
- Latest
- Trending
