തലശ്ശേരി: മലബാര് മേഖലയിലെ പ്രമുഖ അര്ബുദ ചികിത്സാ-ഗവേഷണ കേന്ദ്രമായ തലശ്ശേരി മലബാര് കാന്സര് സെന്റര് (എംസിസി) വടകര പാര്ലമെന്റ് മണ്ഡലം എംപി 
ഷാഫി പറമ്പില് സന്ദര്ശിച്ചു. എംസിസി ഡയറക്ടര് ഡോ. ബി. സതീശന്റെ നേതൃത്വത്തിലുള്ള സംഘത്തോടൊപ്പം ആശുപത്രിയിലെ വിവിധ വിഭാഗങ്ങള് സന്ദര്ശിച്ച 
എംപി, നിലവില് അവിടെ നടന്നുവരുന്ന പ്രവര്ത്തനങ്ങള് നേരിട്ട് വിലയിരുത്തി.
കാല് നൂറ്റാണ്ടായി കാന്സര് ചികിത്സാരംഗത്ത് മികച്ച സേവനം കാഴ്ചവെക്കുന്ന മലബാര് കാന്സര് സെന്റര്, നിലവില് അധ്യാപന-ഗവേഷണ രംഗങ്ങളിലും ശ്രദ്ധേയമായ സംഭാവനകളാണ് നല്കിക്കൊണ്ടിരിക്കുന്നത്. സ്ഥാപനത്തിന്റെ ഭാവി വികസന പ്രവര്ത്തനങ്ങളുമായി ബന്ധപ്പെട്ട് നേരിടുന്ന വിവിധ പ്രയാസങ്ങളും വെല്ലുവിളികളും ഡയറക്ടര് ഡോ. സതീശന് എംപിയുടെ ശ്രദ്ധയില്പ്പെടുത്തി.
ഇന്ത്യന് കൗണ്സില് ഓഫ് മെഡിക്കല് റിസര്ച്ചിന്റെ (ഐസിഎംആര്) ഗവേണിംഗ് ബോഡിയിലെ പാര്ലമെന്റ് പ്രതിനിധി എന്ന നിലയില്, മലബാര് കാന്സര് സെന്ററിന്റെ 
എല്ലാവിധ വികസന പ്രവര്ത്തനങ്ങള്ക്കും ആവശ്യമായ പൂര്ണ പിന്തുണ നല്കുമെന്ന് ഷാഫി പറമ്പില് എംപി ഉറപ്പുനല്കി. സ്ഥാപനത്തിന്റെ വികസനത്തിന് കൂടുതല് വേഗത പകരുന്നതിനായി സമീപഭാവിയില് തന്നെ ആരോഗ്യ മന്ത്രിയുടെയും ഐസിഎംആര് ഡയറക്ടറുടെയും സന്ദര്ശനം ഇവിടെ ഉറപ്പാക്കാന് ആവശ്യമായ ഇടപെടലുകള് നടത്തുമെന്നും എംപി വ്യക്തമാക്കി.
സന്ദര്ശനത്തിന് ശേഷം നടന്ന പ്രത്യേക അവലോകന യോഗത്തില് സെന്റര് ഡയറക്ടര് ഡോ. സതീശന്, വിവിധ വിഭാഗം മേധാവികള്, മറ്റ് പ്രമുഖ ഉദ്യോഗസ്ഥര് എന്നിവര് പങ്കെടുത്തു.
