കൊച്ചി: നിയമസഭാ തെരഞ്ഞെടുപ്പില് അഞ്ചു ജില്ലകളിലെ മുഴുവന് സീറ്റുകളും യുഡിഎഫ് നേടുമെന്ന് പ്രതിപക്ഷ നേതാവ് വി.ഡി. സതീശന്. എറണാകുളം, മലപ്പുറം, ഇടുക്കി, 
പത്തനംതിട്ട, വയനാട് ജില്ലകളില് ക്ലീന് സ്വീപ്പ് ഉണ്ടായാല് അത്ഭുതപ്പെടാനാകില്ല. 43 സീറ്റുകള് യുഡിഎഫിന് ലഭിക്കും. യുഡിഎഫ് ടാര്ഗറ്റ് ചെയ്ത് പ്രചാരണം നടത്തിയിരുന്നുവെന്ന് വി.ഡി. സതീശന് വാര്ത്താസമ്മേളനത്തില് പറഞ്ഞു.
എറണാകുളം, മലപ്പുറം, ഇടുക്കി, പത്തനംതിട്ട, വയനാട് ജില്ലകളില് യുഡിഎഫിന് അനുകൂലമായ തരംഗമുണ്ടായിരുന്നു. അഞ്ചു ജില്ലകളായിരുന്നു യുഡിഎഫിന്റെ ടാര്ഗറ്റ്. ഈ ജില്ലകളിലെ 43 സീറ്റ് കിട്ടിയാലും അത്ഭുതമില്ല. സംസ്ഥാനത്ത് ഒട്ടാകെ യുഡിഎഫ് തരംഗം 
ഉണ്ടാകും. നിലവില് സര്ക്കാരിനെതിരെ ഭരണവിരുദ്ധ വികാരം ഉണ്ട്. അതിന് ബദല് സംവിധാനമാണ് യുഡിഎഫ് മുന്നോട്ടുവയ്ക്കുന്നത്.
നിലവിലെ സാഹചര്യത്തില് മാറ്റം ഉണ്ടാക്കുമെന്നും, അത് ജനങ്ങളെ ബോധിപ്പിച്ചതിലൂടെ ചര്ച്ചയ്ക്ക് വഴിയൊരുക്കി. നല്ല പോളിംഗ് ശതമാനമായിരുന്നു. പ്രവാസികള് കൂടി എത്തിയിരുന്നെങ്കില് കുറച്ചു കൂടെ ശതമാനം കൂടുമായിരുന്നു. പുറത്ത് പഠിക്കുന്നവരും കൂടുതലാണ്. 30 വര്ഷത്തിനിടയിലെ മികച്ച പ്രവര്ത്തനമാണ് യുഡിഎഫ് നടത്തിയത്. തുടക്കം മുതലേ വിജയ പ്രതീക്ഷയുണ്ട്. ദളിത് – പിന്നാക്ക സംഘടനകളുടെ പിന്തുണ ലഭിച്ചിട്ടുണ്ട്.
യുഡിഎഫില് നിന്നും 2005ല് വിട്ടുപോയവര്
വരെ തിരികെയെത്തി. സിപിഎമ്മില് നടക്കുന്ന കലാപത്തിന് പിന്നില് മുതിര്ന്ന നേതാക്കന്മാരാണ്. യുവ മുഖ്യമന്ത്രിയെയും വനിത മുഖ്യമന്ത്രിയേയും കുറിച്ചാണ് എല്ഡിഎഫ് ചര്ച്ച ചെയ്യുന്നത്. മന്ത്രിമാര് മണ്ഡലത്തിനു പുറത്ത് പ്രചാരണത്തിന് പോകാത്തത് എന്തുകൊണ്ടാണ്. സര്ക്കാരിന്റെ പണം ഉപയോഗിച്ചാണ് ഇലക്ഷന് പ്രചരണം നടത്തിയത്. നാട് മുഴുവന് മുഖ്യമന്ത്രിയുടെ ഫോട്ടോ പതിച്ച ഫ്ളക്സ് ബോര്ഡുകളാണ് പ്രചാരണത്തിന് വച്ചത്. സാമ്പത്തിക പ്രശ്നം ഉള്ളതുകൊണ്ട് ഞങ്ങള്ക്കത്ര ഫ്ളക്സ് വയ്ക്കാന് പറ്റിയില്ല-വി.ഡി. സതീശന് പറഞ്ഞു.
