കൊയിലാണ്ടി: കര്‍ണാടക സംഗീതത്തിലെ വിവിധ രാഗങ്ങളായ ദര്‍ബാരി കാനഡയും ഹംസനാദവും ബിലഹരിയും കുളിര്‍മഴയായി പെയ്തിറങ്ങിയത് ആസ്വാദക മനസ്സില്‍. പൊയില്‍ക്കാവ് ദേവീക്ഷേത്ര നടയില്‍ നവരാത്രി ആഘോഷത്തിന്റെ രണ്ടാം ദിവസമായ
തിങ്കളാഴ്ച മുതിര്‍ന്ന പൗരന്മാരുടെ ഗാനാലാപനത്താല്‍ രാഗസുധയൊഴുകിപ്പരന്നത് നവ്യാനുഭവമായി. ക്ഷേത്രാങ്കണത്തില്‍ സംഗീതത്തിന്റെ പൂക്കാലം തീര്‍ത്തത് നാല്‍പതോളം മുതിര്‍ന്ന വനിതകള്‍ ഉള്‍പ്പെടെയുള്ളവരുടെ കൂട്ടായ്മയായ സംഗീത സായന്തനം ചെങ്ങോട്ടുകാവ്. ഈ മുതിര്‍ന്ന പൗരന്മാര്‍ ഇന്ന് നാടിന് തന്നെ മാതൃകയാണ്.
ക്ഷേത്രാങ്കണത്തില്‍ പെയ്തിറങ്ങിയ സംഗീതത്തിന്റെ കുളിര്‍മഴ അന്തരീക്ഷത്തെ ഭക്തിസാന്ദ്രവും ആത്മീയചാരുതയാര്‍ന്നതുമാക്കി മാറ്റി. തിങ്ങിനിറഞ്ഞ സദസ്സിനെ സാക്ഷിയാക്കി മുതിര്‍ന്ന വനിതകള്‍ ഉള്‍പ്പെടെയുള്ളവര്‍ അവതരിപ്പിച്ച സംഗീതാര്‍ച്ചന പ്രദേശവാസികളുടെയും കലാസ്വാദകരുടെയും വലിയ പ്രശംസയാണ് പിടിച്ചുപറ്റിയത്. നാല് വര്‍ഷത്തിലേറെയായി പ്രസിദ്ധ സംഗീതജ്ഞന്‍ പാലക്കാട് പ്രേംരാജാണ് ഇവര്‍ക്ക് സംഗീതാഭ്യസനം നല്‍കുന്നത്. ഗാനാര്‍ച്ചനയ്ക്ക് ശേഷം ചെങ്ങോട്ടുകാവിലെ മുതിര്‍ന്ന പൗരനും ശതാഭിഷിക്തനുമായ കന്മന ശ്രീധരനെ വേദിയില്‍ ആദരിച്ചതും ചടങ്ങിന് ചാരുത പകര്‍ന്ന അനുഭവമായി.
- Latest
- Trending
