വടകര: ഓര്‍ക്കാട്ടേരിയിലെ വസ്ത്രവ്യാപാര സ്ഥാപനമായ ‘ഇവ ബ്രൈഡി’ലുണ്ടായ തീപിടിത്തത്തില്‍ ഏകദേശം ഒരു കോടി രൂപയുടെ നഷ്ടമുണ്ടായതായി ഫയര്ഫോഴ്സ് 
വ്യക്തമാക്കി. ഇടിമിന്നലാണ് അഗ്നിബാധക്ക് കാരണമായതെന്ന പ്രാഥമിക നിഗമനവും അധികൃതര്‍ വെളിപ്പെടുത്തി. ഷോര്‍ട്ട് സര്‍ക്യൂട്ട് അല്ലെന്ന് കെഎസ്ഇബി അധികൃതര്‍ നടത്തിയ പരിശോധനയില്‍ സൂചിപ്പിച്ചിരുന്നു.
തുണിത്തരങ്ങള്‍ സൂക്ഷിച്ചിരുന്ന കെട്ടിടത്തിന്റെ ഒന്നാം നിലയിലും ടെറസിലുമുള്ള ഗോഡൗണുകള്‍ പൂര്‍ണമായും കത്തിയമര്‍ന്നു. എളുപ്പത്തില്‍ തീപിടിക്കുന്ന വസ്തുക്കളായതിനാല്‍ മണിക്കൂറുകള്‍ നീണ്ട കഠിന പരിശ്രമത്തിനൊടുവിലാണ് തീ 
പൂര്‍ണമായും നിയന്ത്രണവിധേയമാക്കാന്‍ കഴിഞ്ഞത്.
വിവരമറിഞ്ഞയുടന്‍ വടകര ഫയര്‍ സ്റ്റേഷനില്‍ നിന്ന് രണ്ട് യൂണിറ്റുകള്‍ എത്തി രക്ഷാപ്രവര്‍ത്തനം തുടങ്ങിയെങ്കിലും തീയുടെ വ്യാപ്തി കൂടിയതോടെ സമീപത്തെ അഞ്ച് സ്റ്റേഷനുകളില്‍ നിന്നുള്ള അമ്പതോളം ജീവനക്കാര്‍ കൂടി സ്ഥലത്തെത്തുകയായിരുന്നു.
വടകര സ്റ്റേഷന്‍ ഓഫീസര്‍ വാസുദേവന്‍, കോഴിക്കോട് റീജിയണല്‍ ഫയര്‍ ഓഫീസര്‍ രഞ്ജിത് കുമാര്‍, നാദാപുരം എസ്ടിഒ എന്നിവരുടെ നേരിട്ടുള്ള മേല്‍നോട്ടത്തിലായിരുന്നു രക്ഷാപ്രവര്‍ത്തനം. 4,500 ലിറ്റര്‍ ശേഷിയുള്ള മൊബൈല്‍ ടാങ്ക് യൂണിറ്റുകള്‍ ഉപയോഗിച്ച് മിനിറ്റില്‍ 2,850 ലിറ്റര്‍ എന്ന തോതില്‍ അതിവേഗം വെള്ളം പമ്പ് ചെയ്ത് കെട്ടിടം തണുപ്പിച്ചാണ് തീയണച്ചത്. താഴത്തെ നിലയിലുള്ള മറ്റു കടകളിലേക്കു തീ വ്യാപകകമായി പടരുന്നത് 
തടയാന്‍ കഴിഞ്ഞത് ആശ്വാസമായി.
അതേസമയം, എളുപ്പം തീയണക്കാന്‍ സഹായിക്കുന്ന ഫയര്‍ ഹൈഡ്രന്റ് അടക്കമുള്ള സംവിധാനങ്ങളുടെ കുറവ് രക്ഷാപ്രവര്‍ത്തനത്തില്‍ പ്രതിസന്ധി സൃഷ്ടിച്ചതായി ഉദ്യോഗസ്ഥര്‍ ചൂണ്ടിക്കാട്ടി. ഒടുവില്‍ വടകര-മാഹി കനാലില്‍ നിന്നു വെള്ളം എത്തിച്ചാണ് ഫയര്ഫോഴ്സ് ദൗത്യം പൂര്‍ത്തിയാക്കിയത്. ഫയര്‍ഫോഴ്സിന്റെയും നാട്ടുകാരുടെയും കൃത്യമായ ഇടപെടല്‍ പ്രദേശത്തെ വന്‍ ദുരന്തത്തില്‍ നിന്നു രക്ഷിച്ചു. വ്യാഴാഴ്ച രാത്രി 8.45-ഓടെയാണ് നാടിനെ പരിഭ്രാന്തിയിലാഴ്ത്തിയ തീപിടിത്തമുണ്ടായത്.
