ന്യൂഡല്‍ഹി: മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിന്റെ രാജിയാവശ്യപ്പെട്ട് പ്രതിപക്ഷം നടത്തിയ പ്രതിഷേധത്തില്‍ വന്‍ സംഘര്‍ഷം. പ്രതിഷേധ മാര്‍ച്ച് പൊലിസ്
തടഞ്ഞതോടെ നേതാക്കളെയും പ്രവര്‍ത്തകരെയും കസ്റ്റഡിയിലെടുത്തു. രാഹുല്‍ ഗാന്ധിയെയും പ്രിയങ്ക ഗാന്ധിയെയും കേരള മുഖ്യമന്ത്രി വി.ഡി.സതീശന്‍ ഉള്‍പ്പെടെയുള്ള നേതാക്കളെയുമാണ് പൊലിസ് കസ്റ്റഡിയിലെടുത്തത്. രാഹുല്‍ ഗാന്ധിയെയും കെ.സി.വേണുഗോപാലിനെയും കൊണ്ടുപോയ പൊലിസ് വാഹനത്തിന്റെ ടയര്‍ പ്രതിഷേധക്കാര്‍ പഞ്ചറാക്കി. ഇതോടെ വാഹനം റോഡില്‍ കുടുങ്ങി. ഏകദേശം അരമണിക്കൂറോളം വാഹനം അവിടെ തന്നെ കിടന്നതോടെ വാഹനത്തിന് ചുറ്റും പ്രവര്‍ത്തകര്‍ തടിച്ചുകൂടി. പ്രവര്‍ത്തകര്‍ വളഞ്ഞതോടെ കസ്റ്റഡിയിലെടുത്ത നേതാക്കളെ മാറ്റാന്‍ പൊലിസിന് സാധിച്ചില്ല. തുടര്‍ന്ന് പകരം വാഹനം എത്തിച്ച് രാഹുല്‍ ഗാന്ധിയെയും കെ.സി.വേണുഗോപാലിനെയും ഉള്‍പ്പെടെയുള്ളവരെ കിംഗ്‌സ്വേ ക്യാമ്പിലേക്ക് മാറ്റുകയായിരുന്നു. അതേസമയം പ്രതിഷേധത്തിനിടെ വനിതാ പൊലിസുകാര്‍ തന്നെ
തള്ളിയിടുകയും ശരീരത്തിലാകെ പോറലേല്‍പ്പിക്കുകയും ചെയ്തതായി പ്രിയങ്ക ഗാന്ധി ആരോപിച്ചു. വിന്‍ഡ്‌സര്‍ സര്‍ക്കിളിലെ റോഡില്‍ കിടന്ന് ഭരണഘടനയുടെ പകര്‍പ്പ് കൈയിലേന്തിയാണ് പ്രിയങ്കയും മറ്റ് വനിതാ നേതാക്കളും പ്രതിഷേധിച്ചത്. പ്രതിപക്ഷ എംപിമാരുമായെത്തിയ വാഹനം ജന്തര്‍ മന്തറിലേക്ക് കടന്നപ്പോള്‍ തന്നെ പൊലീസ് പ്രതിരോധം തീര്‍ത്തിരുന്നു. തുടര്‍ന്ന് പ്രതിഷേധത്തിന് ഐക്യദാര്‍ഢ്യം പ്രഖ്യാപിച്ചെത്തിയ പ്രവര്‍ത്തകരും പൊലീസും തമ്മില്‍ ഉന്തും തള്ളുമുണ്ടായി. തെരഞ്ഞെടുപ്പ് കമീഷന്‍ ആസ്ഥാനത്തേക്ക് നടത്തിയ മാര്‍ച്ചില്‍ ആകാശവാണി ഭവനിലേക്ക് അതിക്രമിച്ചു കയറിയെന്നാരോപിച്ച് ഡല്‍ഹി പൊലീസ് രാഹുല്‍ ഗാന്ധിക്കെതിരെ എഫ്‌ഐആര്‍ ചുമത്തിയിരുന്നു. തനിക്കെതിരെ രജിസ്റ്റര്‍ ചെയ്യുന്ന ഓരോ എഫ്.ഐ.ആറും നെഞ്ചിലെ മെഡല്‍ പോലെയാണെന്നും, കേസുകളെ ഭയന്ന് പിന്മാറില്ലെന്നുമാണ് രാഹുല്‍ ഗാന്ധി പ്രതികരിച്ചത്.
- Latest
- Trending
