വടകര: ദേശീയ പാതയിലെ യാത്രക്കാര്ക്ക് ആശ്വാസം പകര്ന്ന് മൂരാട് പാലം തുറന്നു. ഇന്നു വൈകുന്നേരത്തോടെ പുതിയ പാലത്തിലേക്ക് വാഹനങ്ങള് കടത്തിവിടുകയായിരുന്നു. വാഹനങ്ങളെ നാട്ടുകാര് ആഹ്ലാദപൂര്വം വരവേറ്റു.
വര്ഷങ്ങള് നീണ്ട ഗതാഗതകുരുക്കാണ് ഇവിടെ ഓര്മയാകുന്നത്. കോഴിക്കോട്-കണ്ണൂര് ദേശീയപാതയിലെ ഏറ്റവും ദുരിതമായ പാലമായിട്ടായിരുന്നു മൂരാട്ടെ പഴയപാലത്തെ കണ്ടത്. ഇരുഭാഗത്തും കിലോമീറ്ററുകളോളം ദൂരത്തില് വാഹനങ്ങള് കുരുക്കിലമരുന്നത് പതിവായിരുന്നു. യാത്രപോകുന്നവര് മൂരാട് പാലത്തെ ശപിച്ചു. നിരന്തര സമരങ്ങള്ക്കു ശേഷമാണ് നാലുവരി പാതയുള്ള പുതിയ പാലം പണിയാന് തുടങ്ങിയത്. നിര്മാണ പ്രവൃത്തിക്കിടയിലും ദുരിതം നേരിട്ടു. ഇതിനാണ് ഇന്ന് അറുതിയായത്.
ദേശീയപാത ഉദ്യോഗസ്ഥരും ട്രാഫിക് പോലീസും തേങ്ങ ഉടച്ച് വാഹനങ്ങള് പോകാന് അനുമതി നല്കി. ട്രയല് റണ്ണിനാണ് പാലം തുറന്നുകൊടുത്തത്. ഔപചാരിക ഉദ്ഘാടനം അടുത്ത ദിവസം നടക്കുമെന്നു കരുതുന്നു.