തിരുവനന്തപുരം: സംസ്ഥാനത്ത് റോഡ് അപകടങ്ങളും മരണങ്ങളും അനിയന്ത്രിതമായി വര്‍ധിക്കുന്ന സാഹചര്യത്തില്‍ സര്‍ക്കാര്‍ അടിയന്തര നടപടികള്‍ സ്വീകരിക്കണമെന്ന്
ആവശ്യപ്പെട്ട് പാറക്കല്‍ അബ്ദുള്ള നിയമസഭയില്‍ സബ്മിഷന് ഉന്നയിച്ചു. 2025 ജനുവരി മുതല്‍ 2026 ജൂലൈ വരെയുള്ള കാലയളവില്‍ ആറായിരത്തിലധികം അപകട മരണങ്ങള്‍ റിപ്പോര്‍ട്ട് ചെയ്യപ്പെടുകയും, ഒരു ലക്ഷത്തിലധികം പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്. ഇതില്‍ 60 ശതമാനത്തിലധികം പേരും 18നും 45നും ഇടയില്‍ പ്രായമുള്ളവരാണ്. അതിവേഗത, അശ്രദ്ധ, ലഹരി ഉപയോഗിച്ചുള്ള ഡ്രൈവിംഗ്, ട്രാഫിക് നിയമങ്ങളെക്കുറിച്ചുള്ള അജ്ഞത, ഹൈവേകളില്‍ നിയമങ്ങള്‍ പാലിക്കാത്തത് എന്നിവയാണ് പ്രധാന കാരണങ്ങളായി ചൂണ്ടിക്കാണിക്കുന്നത്. അപകടകരമായ ഡ്രൈവിംഗിനെതിരെ കര്‍ശന നിയമങ്ങള്‍ കൊണ്ടുവരണമെന്നും മനപ്പൂര്‍വമല്ലാത്ത നരഹത്യ എന്ന വകുപ്പ് മാറ്റണമെന്നും ഹൈക്കോടതിയുടെ നിര്‍ദ്ദേശങ്ങള്‍ പരിഗണിക്കണമെന്നും അദ്ദേഹം ആവശ്യപ്പെട്ടു.
സബ്മിഷന് മറുപടിയായി ഗതാഗത മന്ത്രി സി.പി.ജോണ്‍ സര്‍ക്കാരിന്റെ പുതിയ പദ്ധതികള്‍
വിശദീകരിച്ചു. മുഖ്യമന്ത്രി ചെയര്‍മാനായുള്ള ‘കേരള റോഡ് സേഫ്റ്റി മിഷന്‍’ സര്‍ക്കാര്‍ അംഗീകരിച്ചിട്ടുണ്ട്. ലോകാരോഗ്യ സംഘടനയുടെ നിര്‍ദ്ദേശപ്രകാരം റോഡപകട മരണനിരക്ക് ഗണ്യമായി കുറയ്ക്കാനും സ്വീഡന്‍ പോലുള്ള രാജ്യങ്ങളിലെ മികച്ച മാതൃകകള്‍ കേരളത്തില്‍ നടപ്പിലാക്കാനുമാണ് സര്‍ക്കാര്‍ ലക്ഷ്യമിടുന്നത്. ബോധവല്‍ക്കരണ ക്യാമ്പയിനുകള്‍ക്കും എന്‍ഫോഴ്‌സ്‌മെന്റിനും തുല്യപ്രാധാന്യം നല്‍കുമെന്നും അപകടത്തില്‍പ്പെട്ട് കിടപ്പിലായവരെ സഹായിക്കാന്‍ പ്രത്യേക ശ്രദ്ധ നല്‍കുമെന്നും മന്ത്രി വ്യക്തമാക്കി. കാല്‍നടയാത്രക്കാര്‍ക്ക് മുന്‍ഗണന നല്‍കുന്നതിന്റെ ഭാഗമായി സീബ്ര ലൈനുകളുടെ വീതി കൂട്ടുകയും സ്‌കൂളുകള്‍, കോളേജുകള്‍, തദ്ദേശ സ്ഥാപനങ്ങള്‍ എന്നിവയെ ഉള്‍പ്പെടുത്തി വിപുലമായ ക്യാമ്പയിനുകള്‍ നടത്തുമെന്നും മന്ത്രി അറിയിച്ചു.
- Latest
- Trending
