ന്യൂജഴ്സി: ആറാം ലോകകിരീടം ലക്ഷ്യമിട്ട് ആദ്യ മത്സരത്തിനിറങ്ങിയ ബ്രസീലിനെ സമനിലയില് (1-1) കുരുക്കി കഴിഞ്ഞ ലോകകപ്പിലെ നാലാം സ്ഥാനക്കാരായ മൊറോക്കോ. 
ആദ്യ പകുതിയിലാണ് ഇരുടീമുകളും ഗോള് നേടിയത്. ഇതോടെ ഗ്രൂപ്പ് സിയില് ബ്രസീലും മൊറോക്കോയും ഓരോ പോയിന്റ് പങ്കിട്ടു. മത്സരത്തിന്റെ 21 ാം മിനിറ്റില് ഇസ്മായില് സായിബാരിയിലൂടെ മൊറോക്കോയാണ് ആദ്യം ലീഡ് പിടിച്ചത്. പിന്നാലെ വിനീസ്യൂസ് ജൂനിയര് ബ്രസീലിന്റെ സമനില ഗോള് കണ്ടെത്തി. ആദ്യ മിനിറ്റു മുതല് ആധിപത്യം പുലര്ത്തിയ മൊറോക്കോ, ബ്രസീലിന്റെ പ്രതിരോധ നിരയ്ക്ക് കടുത്ത ഭീഷണിയുയര്ത്തി. തുടക്കത്തില് താളം കണ്ടെത്താന് വിഷമിച്ച ബ്രസീലിന്റെ പ്രതിരോധനിരയെ പരീക്ഷിച്ച് മൊറോക്കോ താരങ്ങള് തുടര്ച്ചയായി ഇരച്ചുകയറി. ഗോളെന്നുറപ്പിച്ച രണ്ട് അവസരങ്ങളാണ് 
തുടക്കത്തിലെ മൊറോക്കോ നഷ്ടപ്പെടുത്തിയത്. പിന്നാലെ മൊറോക്കോയുടെ ഗോള്വല ലക്ഷ്യമാക്കി ബ്രസീല് പ്രത്യാക്രമണം നടത്തിയെങ്കിലും ലക്ഷ്യം കണ്ടെത്താനായില്ല. മൊറോക്കോ ലീഡ് നേടിയതിനു പിന്നാലെ ഹൈഡ്രേഷന് ബ്രേക്കിനു പോയ ടീമുകള് മടങ്ങിയെത്തി നിമിഷങ്ങള്ക്കുള്ളില് ബ്രസീല് ഗോള് മടക്കുകയായിരുന്നു. ഗോള് നേടിയതോടെ ആത്മവിശ്വാസം വീണ്ടെടുത്ത ബ്രസീല് മികച്ച ഒത്തിണക്കത്തോടെ കളിക്കളത്തില് നിറഞ്ഞു. ആദ്യ പകുതി അവസാനിക്കുമ്പോള് ഇരുടീമുകളും ഒരോ ഗോള് നേടി തുല്യത പാലിച്ചു.
കാസെമിറോയെയും റോജര് ഇബാനെസിനെയും പിന്വലിച്ച് ഡാനിലോ, ഫാബിന്ഹോ 
കളത്തിലിറക്കിയാണ് ബ്രസീല് രണ്ടാം പകുതി തുടങ്ങിയത്. 61 ാം മിനിറ്റില് ലൂക്കാസ് പക്വേറ്റയെയും ഇഗോര് ടിയാഗോയെയും മടക്കിവിളിച്ച പരിശീലകന് കാര്ലോ ആഞ്ചലോട്ടി, പകരം മത്തെയോസ് കൂന്യ, ലൂയിസ് ഹെന്റിക്ക് എന്നിവരെ മൈതാനത്തേക്കയച്ചു. 64 ാം മിനിറ്റിലാണ് മൊറോക്കോ ആദ്യ മാറ്റത്തിനു തുനിഞ്ഞത്. ആദ്യ പകുതിയില് മൊറോക്കോയുടെ ആധിപത്യമാണ് കണ്ടതെങ്കില് രണ്ടാം പകുതിയില് ബ്രസീല് പതിയെ മത്സരം നിയന്ത്രണത്തിലാക്കി. പലകുറി ആക്രമിച്ച് കയറി ഗോള്അവസരങ്ങള് സൃഷ്ടിച്ചെങ്കിലും ലീഡ് നേടാന് ബ്രസീല് നിരയ്ക്കായില്ല. സൂപ്പര് താരം നെയ്മര് ഇല്ലാതെയാണ് ബ്രസീല് ഇറങ്ങിയത്.
