തിരുവനന്തപുരം: സംസ്ഥാനത്ത് ഇന്നും ഒറ്റപ്പെട്ടയിടങ്ങളില് ശക്തമായ മഴക്കു സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. 9 ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്. ഇടുക്കി, എറണാകുളം, തൃശ്ശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്കോട് എന്നീ ജില്ലകളിലാണ് യെല്ലോ അലര്ട്ട്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്.
വടക്കന് കേരള തീരം മുതല് മഹാരാഷ്ട്ര തീരം വരെ ന്യൂന മര്ദ്ദ പാത്തി സ്ഥിതിചെയ്യുന്നുണ്ട്. മധ്യ ഗുജറാത്തിനു മുകളില് ചക്രവാതചുഴിയും സ്ഥിതിചെയ്യുന്നു. ഇതോടൊപ്പം കേരള തീരത്തു പടിഞ്ഞാറന് തെക്ക് പടിഞ്ഞാറന് കാറ്റ് ശക്തമായി തുടരുകയാണ്. അതിനാല് കണ്ണൂര്, കാസര്കോട് ജില്ലകളിലെ തീരങ്ങളില് പ്രത്യേക ജാഗ്രത ആവശ്യമാണ്. ഉയര്ന്ന തിരമാലകളും കടല് കൂടുതല് പ്രക്ഷുബ്ധമാകാനും സാധ്യതയുള്ളതായി ദേശീയ സമുദ്രസ്ഥിതിപഠന ഗവേഷണ കേന്ദ്രവും അറിയിച്ചിട്ടുണ്ട്.
കേരള തീരത്തും തമിഴ്നാട് തീരത്തും 29നു രാത്രി 11.30 വരെ കള്ളക്കടല് പ്രതിഭാസത്തിനും ഉയര്ന്ന തിരമാലയ്ക്കും സാധ്യതയുണ്ടെന്നും ദേശീയ സമുദ്രസ്ഥിതിപഠന ഗവേഷണ കേന്ദ്രം അറിയിച്ചു. ഈ പ്രദേശങ്ങളിലെ മത്സ്യത്തൊഴിലാളികളും തീരദേശവാസികളും പ്രത്യേക ജാഗ്രത പാലിക്കണം.
തെക്ക്-പടിഞ്ഞാറന് അറബിക്കടല് അതിനോട് ചേര്ന്ന തെക്ക്-കിഴക്കന് അറബിക്കടല്, മധ്യ അറബിക്കടല്, വടക്കന് ആന്ധ്രാപ്രദേശ് തീരം അതിനോട് ചേര്ന്ന പ്രദേശങ്ങള് എന്നിവിടങ്ങളില് മണിക്കൂറില് 45 മുതല് 55 കിലോമീറ്റര് വരെയും ചില അവസരങ്ങളില് മണിക്കൂറില് 65 കിലോമീറ്റര് വരെയും വേഗതയില് ശക്തമായ കാറ്റിനും സാധ്യതയുണ്ട്.