തിരുവനന്തപുരം: എല്ഡിഎഫിനതിരെ രൂക്ഷ വിമര്ശനവുമായി യുഡിഎഫ് കണ്വീനര് എംഎം.ഹസ്സന്. എല്ഡിഎഫിന് നേതൃത്വം നല്കാന് സിപിഎമ്മിന് അര്ഹതയില്ലെന്നും പ്രസക്തി നഷ്ടപ്പെട്ട സിപിഎം പിരിച്ച് വിടേണ്ട സമയമായെന്നും എംഎംഹസ്സന് വിമര്ശിച്ചു. സിപിഎമ്മിനെതിരെ ബിനോയ് വിശ്വം നടത്തിയ വിമര്ശനങ്ങളുടെ പശ്ചാത്തലത്തിലാണ് എം.എം.ഹസ്സന്റെ പ്രതികരണം. മുന്നണി വിട്ട് പുറത്തുവരാന് സിപിഐ തയ്യാറാകണമെന്നും അദ്ദേഹം പറഞ്ഞു. കമ്യൂണിസ്റ്റ് ആശയങ്ങളില് നിന്ന് വഴിമാറിയുള്ള സിപിഎം നേതൃത്വത്തിന്റെ സഞ്ചാരത്തിന് അണികളുടെ പിന്തുണയില്ലെന്ന് സിപിഎം ജില്ലാ കമ്മിറ്റികളിലെ വിമര്ശനത്തിലൂടെ അടിവരയിടുന്നു. ഇതിലുള്ള പ്രതിഷേധവും സ്വന്തം നേതാക്കളോടുള്ള അവിശ്വാസവും കാരണമാണ് കഴിഞ്ഞ ലോക്സഭാ തെരഞ്ഞെടുപ്പില് ബിജെപിക്ക് വോട്ട് ചെയ്യാന് സിപിഎം അണികള് തീരുമാനിച്ചത്. സിപിഎമ്മിന്റെ അസ്ഥിവാരം തോണ്ടുന്ന ഗുരുതരമായ ആരോപണമാണ് സിപിഎമ്മിന്റെ മുന് ജില്ലാ കമ്മിറ്റി അംഗം മനുതോമസ് ഉന്നയിക്കുന്നത്. സ്വന്തം അണികളെ ബോധ്യപ്പെടുത്താനെങ്കിലും ആരോപണങ്ങള്ക്ക് മറുപടി പറയാനുള്ള ആര്ജവം മുഖ്യമന്ത്രിയും എംവി ഗോവിന്ദനും കാട്ടണമെന്നും എംഎം ഹസ്സന് പറഞ്ഞു.
സിപിഎം നേതൃത്വത്തിന്റെ ക്രിമിനല്, ക്വട്ടേഷന്, മാഫിയ ബന്ധങ്ങളുടെ ഉള്ളറകളെ സംബന്ധിച്ച തുറന്ന് പറച്ചിലാണ് മുന് ജില്ലാ കമ്മിറ്റി അംഗം കൂടിയായ മനുതോമസ് നടത്തിയിരിക്കുന്നത്. വര്ഷങ്ങളായി യുഡിഎഫ് ഇക്കാര്യം പറഞ്ഞ് കൊണ്ടിരിക്കുകയാണ്. മനുതോമസിന്റെ ആരോപണത്തിലൂടെ അതിന്റെ ഭീകരത പൊതുസമൂഹത്തിന് കൂടുതല് ബോധ്യമായി. മുഖ്യമന്ത്രിയുടെ ഓഫീസ് കേന്ദ്രീകരിച്ച് നടന്ന സ്വര്ണക്കടത്ത് മുതല് സിപിഎം നേതാക്കള്ക്ക് സ്വര്ണത്തോടുള്ള അഭിനിവേശം വരെ പുറത്ത് വന്നതാണ്. അത് ഒരിക്കല്ക്കൂടി ഊട്ടിയുറപ്പിക്കുകയാണ് മനുതോമസ് തന്റെ ആരോപണത്തിലൂടെയെന്നും എം.എം.ഹസ്സന് കൂട്ടിച്ചേര്ത്തു.