കണ്ണൂര്: അയല്വാസികള് തമ്മിലുണ്ടായ വാക്തര്ക്കത്തെത്തുടര്ന്ന് മര്ദനമേറ്റ ഗൃഹനാഥന് മരിച്ചു. തുളിച്ചേരി നമ്പ്യാര്മൊട്ടയിലെ അമ്പന്ഹൗസില് അജയകുമാര് (62) ആണ് മരിച്ചത്. അജയകുമാറിന്റെ കൂടെയുണ്ടായിരുന്ന സുഹൃത്ത് പ്രവീണ്കുമാര് (52) പരിക്കേറ്റ് ചികിത്സയിലാണ്. സംഭവത്തില് ഓട്ടോഡ്രൈവറായ അയല്വാസിയും രണ്ട് മക്കളും ഉള്പ്പെടെ നാലുപേരെ കണ്ണൂര് ടൗണ് പോലീസ് കസ്റ്റഡിയിലെടുത്തു.
ഞായറാഴ്ച രാത്രിയാണ് സംഭവം. ഓട്ടോറിക്ഷ കഴുകുന്ന വെള്ളം റോഡിലേക്ക് ഒഴുക്കുന്നത് സംബന്ധിച്ചുണ്ടായ തര്ക്കമാണ് കൊലപാതകത്തില് കലാശിച്ചത്. വാക്കേറ്റം കൈയാങ്കളിയില് എത്തുകയായിരുന്നു. ഹെല്മെറ്റ് കൊണ്ടുള്ള അടിയേറ്റ് നിലത്തുവീണ അജയകുമാറിനെ ഓട്ടോഡ്രൈവറും മക്കളും ചേര്ന്ന് വടിയുപയോഗിച്ച് അടിച്ചുപരിക്കേല്പ്പിച്ചുവെന്നുമാണ് പോലീസ് പറയുന്നത്.
പരിക്കേറ്റ അജയകുമാറിനെയും പ്രവീണ്കുമാറിനെയും നാട്ടുകാര് കണ്ണൂരിലെ സ്വകാര്യ ആശുപത്രിയിലെത്തിച്ചെങ്കിലും അജയകുമാര് മരിച്ചു. ഇലക്ട്രീഷ്യനായ അജയകുമാര് മൂന്ന് സഹോദരിമാര്ക്കൊപ്പമാണ് താമസം. കണ്ണൂര് ടൗണ് പോലീസ് അന്വേഷണം തുടങ്ങി.