കണ്ണൂര്: മുതിര്ന്ന പൗരന്മാരുടെ വീട്ടിലെത്തി വോട്ട് ചെയ്യിക്കുന്ന പ്രക്രിയയില് ബാഹ്യ ഇടപെടല് തടയാതിരുന്ന പോളിങ് സംഘത്തിലെ ഉദ്യോഗസ്ഥരെ ജില്ലാ തെരഞ്ഞെടുപ്പ് ഓഫീസര് കൂടിയായ കലക്ടര് അരുണ് കെ.വിജയന് സസ്പെന്ഡ് ചെയ്തു. സ്പെഷ്യല് പോളിങ് ഓഫിസര്, പോളിങ് അസിസ്റ്റന്റ്, മൈക്രോ ഒബ്സര്വര്, സ്പെഷ്യല് പൊലീസ് ഓഫിസര്, വിഡിയോഗ്രാഫര് എന്നിവരെയാണ് സസ്പെന്ഡ് ചെയ്തത്.
നിയമ വിരുദ്ധമായി പ്രവര്ത്തിച്ച വ്യക്തിക്കും തെരഞ്ഞെടുപ്പു സംഘത്തിനുമെതിരെ ക്രിമനല് നടപടികള് എടുക്കുന്നതിനായി സിറ്റി പൊലീസ് കമ്മീഷണര് വഴി കല്യാശ്ശേരി ഉപവരണാധികാരി ഔദ്യോഗികമായി കണ്ണപുരം പോലീസ് സ്റ്റേഷനില് റിപ്പോര്ട്ട് ചെയ്തിട്ടുമുണ്ട്.
കാസര്കോട് പാര്ലമെന്റ് മണ്ണ്ഡലത്തില് കല്യാശ്ശേരി നിയമസഭ മണ്ഡലത്തിലെ കല്യാശ്ശേരി പഞ്ചായത്തിലാണ് സംഭവം. എടക്കാടന് ഹൗസില് ദേവി(92)യുടെ വീട്ടിലെത്തി വോട്ട് ചെയ്യിക്കുമ്പോള് വോട്ടിന്റെ രഹസ്യ സ്വഭാവം നഷ്ടപ്പെടും വിധം ബാഹ്യ ഇടപെടല് ഉണ്ടായെന്നാണ് ശ്രദ്ധയില്പെട്ടത്. സംഭവത്തില് മണ്ഡലം ഉപവരണാധികാരി നടത്തിയ അന്വേഷണത്തെ തുടര്ന്നാണ് നടപടി.
അഞ്ചാം പീടിക കപ്പോട്കാവ് ഗണേശന് എന്നയാള് വോട്ടിങ് നടപടിയില് ഇടപെട്ടു എന്നും ഇത് ജനപ്രതിനിധ്യ നിയമത്തിന്റെ 128(1) വകുപ്പിന്റെ ലംഘനമാണെന്നും ജില്ലാ കലക്ടര് മുഖ്യ തിരഞ്ഞെടുപ്പ് ഓഫിസര്ക്ക് നല്കിയ റിപ്പോര്ട്ടില് പറഞ്ഞു. ഇവര്ക്കെതിരെ വകുപ്പ് തല നടപടിക്കും പൊലീസ് അന്വേഷണത്തിനും ജില്ലാ കലക്ടറുടെ റിപ്പോര്ട്ടില് ശുപാര്ശ ചെയ്തിട്ടുണ്ട്. വോട്ടിംഗ് നടപടിയില് ഇടപെട്ട ഗണേശന് സിപിഎമ്മുകാരനാണ്.