തലശേരി: പാനൂരില് നിര്മാണത്തിനിടെ ബോംബ് പൊട്ടി ഒരാള് മരിക്കാനിടയായ സംഭവത്തില് അന്വേഷണത്തിന് പ്രത്യേക സംഘത്തെ നിയോഗിച്ചു. കൂത്തുപറമ്പ് എസിപി കെ.വി.വേണുഗോപാലിന്റെ നേതൃത്വത്തിലാണ് പ്രത്യേക സംഘം രൂപീകരിച്ചത്. സംഭവവുമായി ബന്ധപ്പെട്ട് മൂന്നു പേരെ പോലീസ് കസ്റ്റഡിയിലെടുത്തതായി സൂചനയുണ്ട്. ബോംബ് നിര്മാണത്തില് കുന്നോത്തുപറമ്പ്, പുത്തൂര്, കൈവേലിക്കല് എന്നിവിടങ്ങളില് നിന്നുള്ളവര്ക്ക് പങ്കുണ്ടെന്ന് പോലീസ് സംശയിക്കുന്നു. സ്ഫോടനം നടന്ന സ്ഥലത്ത് കൊളവല്ലൂര്, പാനൂര് പോലീസ് സംഘത്തിന്റെ നേതൃത്വത്തില് കൂടുതല് സേനയെ വിന്യസിച്ചു. സംഭവ സ്ഥലത്തുനിന്നു കണ്ടെടുത്ത മുഴുവന് ബോംബുകളും നിര്വീര്യമാക്കിയതായി കണ്ണൂര് സിറ്റി പോലീസ് കമ്മീഷണര് അജിത്ത് കുമാര് പറഞ്ഞു.
വെള്ളിയാഴ്ച പുലര്ച്ചെ ഒരു മണിക്കാണ് ഏവരേയും നടുക്കിയ സ്ഫോടനം. പാനൂര് കൈവേലിക്കല് മുളിയാത്തോട് നിര്മാണത്തിലിരിക്കുന്ന വീടിന്റെ ടെറസില് നിന്ന് ബോംബ് പൊട്ടിത്തെറിക്കുകയായിരുന്നു. സംഭവത്തില് മുഖത്തു ഗുരുതരമായി പരിക്കേറ്റ മൂളിയാത്തോട് കാട്ടിന്റവിട ഷെറിന് (31) മരണപ്പെട്ടിരുന്നു. നാല് പേര്ക്കായിരുന്നു പരിക്ക്. സ്ഫോടനത്തില് സിപിഎം ലോക്കല് കമ്മിറ്റി അംഗത്തിന്റെ മകന് കൂടിയായ മൂളിയാത്തോട് വലിയപറമ്പത്ത് വിനീഷ് ഇരുകൈപ്പത്തികളും ചിതറി ഗുരുതരാവസ്ഥയില് കോഴിക്കോട്ടെ സ്വകാര്യ ആശുപത്രിയില് ചികിത്സയിലാണ്. സംഭവത്തില് സമഗ്രാന്വേഷണം വേണമെന്ന് ആവശ്യപ്പെട്ട് സിപിഎം തന്നെ രംഗത്തെത്തിയിരുന്നു. ഇതിന്റെ കൂടി പശ്ചാത്തലത്തിലാണ് പ്രത്യേക സംഘം രൂപീകരിച്ചത്. ഇതിനിടെ നിര്മാണം നടക്കുന്ന തന്റെ വീട്ടില് കയറി അറിവോ സമ്മതമോ കൂടാതെ ബോംബ് നിര്മാണം
നടന്നതില് കൃത്യമായ അന്വേഷണം നടത്തണമെന്ന് ആവശ്യപ്പെട്ട് വീട്ടുടമ കെ.പി.രാധ പാനൂര് പോലീസില് പരാതി നല്കി.