വന്യമൃഗങ്ങള്‍ നാട്ടുകാരുടെ ഉറക്കം കെടുത്തുന്നു

കക്കട്ടില്‍: കാട്ടുപന്നി, മുള്ളന്‍പന്നി തുടങ്ങിയവയുടെ ശല്യം നാട്ടുകാരുടെ ഉറക്കം കെടുത്തുന്നു. കപ്പയും വാഴയും തെങ്ങിന്‍ തൈയും മറ്റ് ഇടവിളകളും വ്യാപകമായി
നശിപ്പിക്കുകയാണ്. രാത്രിയിലാണ് സഞ്ചാരം. ഇവയുടെ മുന്നില്‍പെട്ടാല്‍ കഥ കഴിഞ്ഞത് തന്നെ. പന്നി ശല്യം കാരണം പലരും കൃഷിയില്‍ നിന്ന് പിന്‍മാറി. ദിവസങ്ങള്‍ക്ക് മുമ്പ് വട്ടോളി ഭാഗത്ത് കുറ്റന്‍ കാട്ടുപന്നിയെ വെടിവെച്ച് കൊന്നിരുന്നു. അതിന് ശേഷവും പന്നിയെ കണ്ടതായി നാട്ടുകാര്‍ പറയുന്നു.
പന്നികളുടെ ആക്രമണത്തിന് പുറമെ പെരുമ്പാമ്പുകളും വിരുന്നുകാരായി എത്തുന്നുണ്ട്. കഴിഞ്ഞ ദിവസം വട്ടോളി വയല്‍പ്രദേശത്ത് കുറ്റന്‍ പെരുമ്പാമ്പിനെ നാട്ടുകാര്‍ പിടികൂടിയിരുന്നു. പലയിടങ്ങളിലും വെള്ളം കെട്ടി നില്‍ക്കുന്നതും കുന്നുകള്‍ ഇടിച്ച് നിരത്തി വയലും മറ്റും നികത്തുന്നതും കാരണം ഇഴജന്തുകളുടെ ആവാസ കേന്ദ്രം നഷ്ടപ്പെടുകയാണ്. മിക്കവയും വീടുകള്‍ക്കരികിലെ പൊന്തുക്കാടുകള്‍ താവളമാക്കിയിരിക്കുകയാണ്. വീടിനോട് ചേര്‍ന്ന കാടുകള്‍ വെട്ടി തെളിയിച്ചാല്‍ പാമ്പുകളുടെയും മറ്റും ശല്യം ഒരു പരിധി വരെ കുറക്കാന്‍ കഴിയും. ഇക്കാര്യത്തില്‍ അധികൃതരുടെ ഭാഗത്ത് നിന്ന് ജാഗ്രതയും നടപടിയും വേണ്ടതുണ്ടെന്നാണ് നാട്ടുകാരുടെ അഭ്യര്‍ഥന.

No Result