കൊച്ചി: മുഖ്യമന്ത്രിയും ധനമന്ത്രിയുമായ വി.ഡി.സതീശന് അവതരിപ്പിച്ച സംസ്ഥാന ബജറ്റ് പ്രവാസികളുടെയും മടങ്ങിയെത്തിയ പ്രവാസികളുടെയും അടിയന്തരവും ദീര്ഘകാലമായി
നിലനില്ക്കുന്നതുമായ ക്ഷേമ നടപടികളില് ഭൂരിഭാഗവും അവഗണിച്ചിരിക്കുകയാണന്ന് പ്രവാസി ലീഗല് സെല് അഭിപ്രായപ്പെട്ടു. കേരളത്തെ പണമയക്കല് സമ്പദ്വ്യവസ്ഥയില് നിന്ന് നിക്ഷേപ സമ്പദ്വ്യവസ്ഥയിലേക്ക് മാറ്റുകയെന്ന ലക്ഷ്യത്തോടെ പ്രഖ്യാപിച്ച ‘പ്രവാസി ഇന്വെസ്റ്റ്മെന്റ് ട്രസ്റ്റ് ഫണ്ട്’ സ്വാഗതാര്ഹമാണെങ്കിലും ലക്ഷക്കണക്കിന് പ്രവാസികളുടെയും മടങ്ങിയെത്തിയ പ്രവാസികളുടെയും ജീവിതവുമായി ബന്ധപ്പെട്ട അടിയന്തര ക്ഷേമപ്രശ്നങ്ങള്ക്ക് ആവശ്യമായ പ്രാധാന്യം ബജറ്റില് ലഭിച്ചിട്ടില്ല. യുഡിഎഫ് തെരഞ്ഞെടുപ്പ് പ്രകടനപത്രികയില് പ്രവാസി ക്ഷേമവുമായി ബന്ധപ്പെട്ട് നല്കിയിരുന്ന പ്രധാന വാഗ്ദാനങ്ങളില് ഭൂരിഭാഗത്തിനും ബജറ്റില് ഇടം കിട്ടിയിട്ടില്ല. പ്രവാസി പെന്ഷന് വര്ധിപ്പിക്കല്, പ്രവാസി ക്ഷേമ ബോര്ഡിനുള്ള സര്ക്കാര് വിഹിതം വര്ധിപ്പിക്കല്, 60 വയസ് കഴിഞ്ഞ പ്രവാസികള്ക്കും അംഗത്വവും ആനുകൂല്യങ്ങളും നല്കല്, മടങ്ങിയെത്തിയ പ്രവാസികള്ക്കായുള്ള നോര്ക്ക കെയര് ഇന്ഷുറന്സ് പദ്ധതി, പുനരധിവാസ പദ്ധതികള് തുടങ്ങിയ സുപ്രധാന വാഗ്ദാനങ്ങള് ബജറ്റില് ഉള്പ്പെട്ടിട്ടില്ല. പ്രവാസി പെന്ഷന് വിതരണം ഒന്നര മാസമായി മുടങ്ങിക്കിടക്കുകയാണ്. തുച്ഛമായ ഈ ക്ഷേമ പെന്ഷനെ ആശ്രയിച്ച് ജീവിതം മുന്നോട്ട് കൊണ്ടുപോകുന്ന ആയിരക്കണക്കിന് പ്രവാസികളുടെ പെന്ഷന് കുടിശ്ശിക തീര്ക്കുന്നതിനോ, മുടക്കമില്ലാതെ പെന്ഷന് എല്ലാ മാസവും സമയബന്ധിതമായി വിതരണം ചെയ്യുന്നതിനോ ആവശ്യമായ പ്രത്യേക ബജറ്റ് വകയിരുത്തലോ സംവിധാനമോ പ്രഖ്യാപിച്ചിട്ടില്ല. പ്രവാസി പെന്ഷന് വിതരണം മുടക്കമില്ലാതെ ഉറപ്പാക്കുന്നതിന്
ആവശ്യമായ ഫണ്ട് ബജറ്റില് വകയിരുത്തണമെന്ന ശക്തമായ ആവശ്യം ധനമന്ത്രി പരിഗണിച്ചില്ലെന്നത് അത്യന്തം നിരാശാജനകമാണ്. മടങ്ങിയെത്തിയ പ്രവാസികള്ക്കായുള്ള ‘നോര്ക്ക കെയര് ആരോഗ്യ ഇന്ഷുറന്സ് പദ്ധതി’ നടപ്പിലാക്കുമെന്ന യുഡിഎഫ് തെരഞ്ഞെടുപ്പ് വാഗ്ദാനവും ബജറ്റില് അവഗണിക്കപ്പെട്ടു. പദ്ധതി നടപ്പാക്കുന്ന ഏജന്സിയായ നോര്ക്ക റൂട്ട്സ് ഇതിനോടകം തന്നെ സര്ക്കാരിന് അനുകൂല ശുപാര്ശ സമര്പ്പിക്കുകയും പദ്ധതി നടപ്പാക്കാന് തയ്യാറാണെന്ന് അറിയിക്കുകയും ചെയ്തിട്ടുള്ള സാഹചര്യത്തിലും അതിനാവശ്യമായ യാതൊരു പ്രഖ്യാപനമോ അനുമതിയോ ഉണ്ടായിട്ടില്ല. പ്രത്യേകിച്ച്, ഈ പദ്ധതി നടപ്പിലാക്കുന്നതിനായി സര്ക്കാരിന് അധിക സാമ്പത്തിക ബാധ്യതയോ ബജറ്റ് വകയിരുത്തലോ ആവശ്യമില്ലെന്നിരിക്കെ, പദ്ധതി മുന്നോട്ടുകൊണ്ടുപോകുന്നതിനുള്ള ഭരണാനുമതി പോലും നോര്ക്ക റൂട്ട്സിന് ഇതുവരെ നല്കാതിരുന്നത് ഖേദകരവും പ്രവാസി സമൂഹത്തോടുള്ള അവഗണനയുമാണ്. പ്രവാസി ക്ഷേമ ബോര്ഡിന്റെ പ്രവര്ത്തനം കൂടുതല് കാര്യക്ഷമമാക്കാന് സര്ക്കാര് നടപടി സ്വീകരിക്കുമെന്ന അവ്യക്തമായ പരാമര്ശം മാത്രമാണ് ബജറ്റ് പ്രസംഗത്തിലുള്ളത്. ഇത്തരം പൊതുപ്രസ്താവനകള് മാത്രം മതിയാകില്ല. വെല്ഫെയര് ബോര്ഡിനെ ശക്തിപ്പെടുത്തുന്നതിനും അംഗങ്ങളുടെ ക്ഷേമം ഉറപ്പാക്കുന്നതിനുമായി വ്യക്തമായ നയപരമായ തീരുമാനങ്ങളും സാമ്പത്തിക വകയിരുത്തലുകളും സമയബന്ധിത നടപടികളുമാണ് പ്രവാസി സമൂഹം പ്രതീക്ഷിക്കുന്നത്.
60 വയസ് കഴിഞ്ഞ പ്രവാസികള്ക്കും ക്ഷേമ പദ്ധതി അംഗത്വവും ആനുകൂല്യങ്ങളും അനുവദിക്കണമെന്ന ദീര്ഘകാല ആവശ്യം ബജറ്റില് പരിഗണിക്കാതിരുന്നതും
ഖേദകരമാണ്. യുഡിഎഫ് തെരഞ്ഞെടുപ്പ് പ്രകടനപത്രികയില് ഈ വിഷയത്തില് വ്യക്തമായ ഉറപ്പ് നല്കിയിരുന്നുവെങ്കിലും ബജറ്റില് അതിനെക്കുറിച്ച് യാതൊരു പരാമര്ശവും ഉണ്ടായിട്ടില്ല. പ്രവാസി സമൂഹത്തിന് നല്കിയ വാഗ്ദാനങ്ങള് പാലിക്കുന്നതില് വന്ന ഈ ഗുരുതരമായ വീഴ്ചകള് സര്ക്കാര് തിരുത്തണമെന്ന് പ്രവാസി ലീഗല് സെല് ആവശ്യപ്പെട്ടു. അനുബന്ധ ബജറ്റ് വകയിരുത്തലുകളിലൂടെയോ പ്രത്യേക പ്രവാസി ക്ഷേമ പാക്കേജിലൂടെയോ പ്രവാസി പെന്ഷന് കുടിശ്ശിക ഉടന് വിതരണം ചെയ്യുന്നതിനും ഇനിമുതല് പെന്ഷന് മുടക്കമില്ലാതെ എല്ലാ മാസവും നല്കുന്നതിനും നോര്ക്ക കെയര് ഇന്ഷുറന്സ് പദ്ധതി നടപ്പിലാക്കുന്നതിനും പ്രവാസി ക്ഷേമ ബോര്ഡിനുള്ള സര്ക്കാര് പിന്തുണ വര്ധിപ്പിക്കുന്നതിനും 60 വയസ് കഴിഞ്ഞ പ്രവാസികള്ക്കും അംഗത്വവും ആനുകൂല്യങ്ങളും അനുവദിക്കുന്നതിനും യുഡിഎഫ് തെരഞ്ഞെടുപ്പ് പ്രകടനപത്രികയില് നല്കിയിട്ടുള്ള മറ്റ് വാഗ്ദാനങ്ങള് നടപ്പിലാക്കുന്നതിനും സര്ക്കാര് അടിയന്തര നടപടികള് സ്വീകരിക്കണമെന്ന് പ്രവാസി ലീഗല് സെല് അഭ്യര്ഥിച്ചു.
