പെരിങ്ങത്തൂര്: ഫിഫ ലോകകപ്പ് ഫുട്ബാളില് വളണ്ടിയര് കോ-ഓര്ഡിനേറ്ററായി പെരിങ്ങത്തൂര് സ്വദേശി പി.കെ.നൗഷാദിന് ചുമതല. ഇത് അഞ്ചാം തവണയാണ് ഫിഫ 
ലോകകപ്പില് ഒഫിഷ്യലായി നൗഷാദ് എത്തുന്നത്. ഇതിനായി 16ന് അദ്ദേഹം യുഎസ്എയിലേക്ക് പോകും. യുഎസ്എ, കാനഡ, മെക്സികോ എന്നിവിടങ്ങളിലെ 16 നഗരങ്ങള് ആതിഥേയത്വം വഹിക്കുന്ന ഫിഫ ലോകകപ്പിലെ പ്രധാന മലയാളി സാന്നിധ്യം കൂടിയാണ് ഈ അധ്യാപകന്.
2010-ല് ദക്ഷിണാഫ്രിക്കയില് നടന്ന ഫിഫ ലോകകപ്പിലും 2014ല് ബ്രസീലില് നടന്ന ലോകകപ്പിലും മീഡിയ ആന്ഡ് കമ്യൂണിക്കേഷന് വളണ്ടിയറായി സേവനം കാഴ്ച 
വെച്ചിരുന്നു. ബ്രസീല് ലോകകപ്പിലെ മികച്ച പ്രവര്ത്തനത്തിന് നൗഷാദ് ഉള്പ്പെട്ട വളണ്ടിയര് ടീമിന് 2015ലെ ഫിഫ ഫെയര് പ്ലേ അവാര്ഡ് ലഭിച്ചിരുന്നു. പഠനകാലത്ത് കോളജ് ക്യാമ്പസില്നിന്ന് തുടങ്ങിയ വളണ്ടിയര് മികവാണ് ഫിഫ ലോകകപ്പിന്റെയും ഇന്ത്യന് സൂപ്പര് ലീഗിന്റെയും മുന്നിര വളണ്ടിയര് പദവിയിലേക്ക് ഇദ്ദേഹത്തെ എത്തിച്ചത്. പിഴവുകളില്ലാതെ മുന് ലോകകപ്പുകളില് അനുഷ്ഠിച്ച സേവനം തുടര്ന്നുള്ള ഫിഫ സീസണുകളില് ഒഫിഷ്യലാകാന് ഇദ്ദേഹത്തിന് സാധിച്ചിട്ടുണ്ട്.
2018-റഷ്യന് ലോകകപ്പിലും 2022-ലെ ഖത്തര് ലോകകപ്പിലും 
വളണ്ടിയര് കോഓര്ഡിനേറ്റര് എന്ന ഉത്തരവാദിത്വം ഭംഗിയായി നിര്വഹിച്ചിട്ടുണ്ട്. ഇന്ത്യന് ഫുട്ബാളിന് പുതിയ മുഖം നല്കിയ ഇന്ത്യന് സൂപ്പര് ലീഗിന്റെ ആദ്യ സീസണില് കൊച്ചി വേദിയുടെ ടൂര്ണമെന്റ് ഓപ്പറേഷന്സ് മാനേജറായിരുന്നു നൗഷാദ്. ഐഎസ്എലിന്റെ രണ്ടാം പതിപ്പില് കേരള ബ്ലാസ്റ്റേഴ്സ് ടീമിന്റെ എവേ ടീം കോഓര്ഡിനേറ്റര് എന്ന പദവിയും ഇദ്ദേഹം കൈകാര്യം ചെയ്തിട്ടുണ്ട്.
കോളജ് പഠനകാലത്ത് കേരളത്തിലെ മികച്ച നാഷനല് സര്വീസ് സ്കീം വളണ്ടിയര്ക്കുള്ള സംസ്ഥാന അവാര്ഡ് ഇദ്ദേഹം നേടിയിട്ടുണ്ട്. ലോകകപ്പ് അനുഭവങ്ങള് കോര്ത്തിണക്കി 
കാല്പ്പന്തിനൊപ്പം ഭൂഖണ്ഡങ്ങളിലൂടെ എന്ന പുസ്തകവും പ്രസിദ്ധീകരിച്ചിട്ടുണ്ട്. ഖത്തര് ടീമിലെ അംഗം മലയാളി തഹസിറിന് പുറമെ, ഒഫിഷ്യല് വളണ്ടിയറുടെ കോഓര്ഡിനേറ്ററായ പി.കെ.നൗഷാദിന്റെ സാന്നിധ്യവും മലയാളിക്ക് അഭിമാനമാവുകയാണ്.
പെരിങ്ങത്തൂര് എന്എഎം ഹയര് സെക്കന്ററി സ്കൂള് ഇംഗ്ലീഷ് അധ്യാപകനായ നൗഷാദ് മേക്കുന്നിലെ കുന്നോത്ത് നെല്ലിക്ക മമ്മു ഹാജിയുടെയും പി.കെ.ഖദിജയുടെയും മകനാണ്. ഭാര്യ: സാബിറ. മക്കള്: ഫാത്തി മസ്വാലിഹ, ആസിയ റഫാത്ത്, മുഹമ്മദ് അസിം.
