കുട്ടിയെ കൊണ്ട് കാറോടിപ്പിച്ചു; ദൃശ്യങ്ങള്‍ പുറത്ത്‌

തിരുവനന്തപുരം: തലസ്ഥാനത്ത് കഴക്കൂട്ടത്ത് കുട്ടിയെ ഡ്രൈവിംഗ് സീറ്റിലിരുത്തി കാറോടിപ്പിക്കുന്ന ദൃശ്യങ്ങൾ പുറത്ത്. കഴക്കൂട്ടം-വിമാനത്താവളം റോഡിൽ അനന്തപുരി ഹോസ്പിറ്റലിന് സമീപമുള്ള ഫ്ലൈ ഓവറിൽ ഇന്ന് രാവിലെയായിരുന്നു സംഭവം. കുട്ടി ഡ്രൈവിംഗ് സീറ്റിലിരിക്കുന്നതും സ്റ്റിയറിംഗ് നിയന്ത്രിക്കുന്നതും ദൃശ്യങ്ങളിൽ കാണാം. കുട്ടിക്കൊപ്പം ഡ്രൈവിംഗ് സീറ്റിൽ ഒരാളുണ്ടെങ്കിലും സ്റ്റിയറിംഗ് പൂ‌ർണമായും നിയന്ത്രിച്ചത് കുട്ടിയായിരുന്നു. ഒപ്പം ഒരു സ്ത്രീയെയും ദൃശ്യങ്ങളിൽ കാണാം. മാതാപിതാക്കളാണ് കുട്ടിക്കൊപ്പമുണ്ടായിരുന്നതെന്നാണ് നിഗമനം. ഇവരുടെ വിവരങ്ങളൊന്നും ലഭിച്ചിട്ടില്ല. സമീപത്തുകൂടിപോയ കൊല്ലം ഇളമ്പൽ സ്വദേശികളായ കാർ യാത്രക്കാരാണ് ദൃശ്യങ്ങൾ മൊബൈൽ ഫോണിൽ പകർത്തിയത്. കാർ ഓടിച്ചത് മൂന്നോ നാലോ വയസുള്ള കുട്ടിയാണെന്ന് ദൃശ്യങ്ങൾ പകർത്തിയ  ഇളമ്പൽ സ്വദേശി പറഞ്ഞു. മറ്റു വാഹനങ്ങളിലെ യാത്രക്കാർ ഹോൺ അടിച്ച് മുന്നറിയിപ്പ് നൽകിയിട്ടും കുട്ടിക്കൊപ്പം ഡ്രൈവിംഗ് സീറ്റിലുണ്ടായിരുന്ന ആൾ അത് കാര്യമാക്കിയില്ല. സംസ്ഥാനത്ത് കൗമാരക്കാരുടെ അശ്രദ്ധമൂലം തുടർച്ചയായുണ്ടാകുന്ന അപകട മരണങ്ങൾക്കിടെയാണ് ഇത്തരത്തിൽ അലംഭാവത്തോടെ മാതാപിതാക്കൾ കുട്ടിയെകൊണ്ട് കാറോടിപ്പിക്കുന്നത്. ദൃശ്യങ്ങൾ പുറത്തുവന്നതിന് പിന്നാലെ മോട്ടോർ വാഹന വകുപ്പും പൊലീസും അന്വേഷണം ആരംഭിച്ചതായാണ് വിവരം.