ന്യൂഡല്ഹി: ഒരാളെ അറസ്റ്റ് ചെയ്യുമ്പോള് പാലിക്കേണ്ട മാനദണ്ഡങ്ങളെ കുറിച്ച് സുപ്രധാന നിര്ദേശവുമായി സുപ്രീം കോടതി. അറസ്റ്റ് ചെയ്യുമ്പോള് അതിന്റെ കാരണം അറസ്റ്റിലായ
ആളെ രേഖാമൂലം അന്വേഷണ ഏജന്സികള് അറിയിക്കണമെന്ന് സുപ്രീം കോടതി നിര്ദേശിച്ചു. അറസ്റ്റിലായ വ്യക്തിക്ക് മനസിലാകുന്ന ഭാഷയില് വേണം അറിയിക്കേണ്ടതെന്നും ഇത് ഭരണഘടനാവകാശമാണെന്നും കോടതി പറഞ്ഞു. പഞ്ചാബിലെ ശിരോമണി അകാലിദള് നേതാവിന്റെ ഹര്ജി പരിഗണിക്കുമ്പോഴാണ് സുപ്രീംകോടതിയുടെ നിര്ദേശം. ജസ്റ്റിസ് ഉജ്വല് ഭുയാന്റെ അധ്യക്ഷതയിലുള്ള ബെഞ്ചാണ് നിര്ദ്ദേശം പുറപ്പെടുവിച്ചത്. ഏതെങ്കിലുമൊരു വ്യക്തിയെ ഏതെങ്കിലുമൊരു അന്വേഷണ ഏജന്സി അറസ്റ്റ് ചെയ്യുകയാണെങ്കില് അതിനുള്ള കാരണം ആ വ്യക്തിയെ രേഖാമൂലം അറിയിക്കണം. അത് ഏതെങ്കിലും ഒരു ഭാഷയില് പോരെന്നും ആ വ്യക്തിക്ക് മനസിലാകുന്ന
ഭാഷയില്ത്തന്നെ ആയിരിക്കണമെന്നും കോടതി പറഞ്ഞു. ഭരണഘടനയുടെ 22(1) അനുഛേദ പ്രകാരം ഏതൊരു വ്യക്തിക്കും പൗരനും ലഭിക്കുന്ന അവകാശമാണിതെന്നും കോടതി ചൂണ്ടിക്കാട്ടി. ഇത് പാലിക്കാതെ നടത്തുന്ന അറസ്റ്റ് നിയമവിരുദ്ധമാണെന്നും കോടതി പറഞ്ഞു. കുറ്റത്തിന്റെ സ്വഭാവമോ ഗൗരവമോ പരിഗണിക്കാതെ ഈ അവകാശം പാലിക്കണം. ഗുരുതര കുറ്റകൃത്യങ്ങളിലാണ് അറസ്റ്റിലാകുന്നതെങ്കില് പോലും അതിന് മുന്പ് കാരണം അറിയിക്കണം. അങ്ങനെ ചെയ്യാതെ അറസ്റ്റ് ചെയ്യുകയാണെങ്കില് ആ ഉദ്യോഗസ്ഥനെതിരെ വകുപ്പുതല നടപടികള് സ്വീകരിക്കാമെന്നും കോടതി വ്യക്തമാക്കി.
- Latest
- Trending
