വടകര: വടകര മുനിസിപ്പാലിറ്റിയിലെ 24-ാം വാര്ഡായ നാരായണനഗറിലുണ്ടൊരു റോഡ്. തകര്ന്ന് തരിപ്പണമായ റോഡ്. ഓര്മവെച്ച കാലം മുതല് ഈ റോഡ് ഇങ്ങനെ തന്നെയാണെന്ന് 
നാട്ടുകാര് സാക്ഷ്യപ്പെടുത്തുന്നു. കുണ്ടുകള് ഇഷ്ടംപോലെയുണ്ട്. വാരിക്കുഴികള് തന്നെയാണ് മിക്കതും. ഇതിനിടയിലൂടെ വേണം വാഹനങ്ങള്ക്ക് പോകാന്. കുഴിയിലാകെ വെള്ളം നിറഞ്ഞതിനാല് കാല്നടക്കാര് കഷ്ടപ്പെട്ടാണ് ലക്ഷ്യം പിടിക്കുന്നത്. റോഡിലൂടെ നടന്നുപോകാന് പറ്റാതെ സമീപത്തെ കടയുടെയും വീടിന്റെയും സ്ഥലത്ത് കല്ലിട്ട് 
അതിലൂടെ പോകേണ്ടി വരുന്നു.
നാരായണനഗറില് തലഉയര്ത്തി നില്ക്കുന്ന ഹോളിഡേ മാള് കെട്ടിടത്തിന് കിഴക്കാണ് ഒരു കിലോമീറ്ററിനടുത്ത് ദൂരമുള്ള ഈ റോഡ്. ഇരുന്നൂറിലേറെ വീട്ടുകാര് ഈ റോഡിനെ ആശ്രയിക്കുന്നുണ്ട്. ഗോകുലം കിന്റര് കാര്ഡന്, ആര്എസ്എസ് കാര്യാലയം, ചില്ഡ്രന്സ് പാര്ക്ക് എന്നിവ സമീപത്ത് സ്ഥിതി ചെയ്യുന്നു. ഈ ഭാഗത്ത് നിന്ന് സഹകരണാശുപത്രിയിലേക്ക് പോകാം. കളരിയുള്ളതില് ക്ഷേത്രത്തിലേക്കും തച്ചോളി 
മാണിക്കോത്ത് ക്ഷേത്രത്തിലേക്കും പോകാനും എളുപ്പ വഴിയാണിത്.
സദാ ആളുകള് ആശ്രയിക്കുന്ന ഇത്തരമൊരു റോഡ് നന്നാക്കിയെടുക്കാന് ആരും ശ്രമിക്കുന്നില്ലെന്നതാണ് അതിശയകരം. നന്നായി ഉയര്ത്തി ആധുനിക റോഡാക്കി മാറ്റാവുന്നതേയുള്ളൂ. പക്ഷേ, എന്ത് ചെയ്യാനാണ്. ഇതൊക്കെ അലങ്കാരമായി കൊണ്ടുനടക്കാനാണ് പലര്ക്കും താല്പര്യം. കൗണ്സിലര്മാര് മാറി വരുന്നതല്ലാതെ റോഡിനൊരു മാറ്റവുമില്ലെന്നാണ് ചിലരുട കമന്റ്. തകര്ച്ചയില് റിക്കാര്ഡിട്ടിരിക്കുന്ന റോഡിന്റെ ദുരവസ്ഥക്ക് പരിഹാരം കാണാന് നഗരസഭാ അധികാരികള് തയ്യാറാകണമെന്നാണ് നാട്ടുകാരുടെ അഭ്യര്ഥന.
