തിരുവനന്തപുരം: സംസ്ഥാനത്ത് കാലവര്ഷം ശക്തിപ്രാപിക്കുന്ന സാഹചര്യത്തില് വിവിധ 
ജില്ലകളില് കേന്ദ്ര കാലാവസ്ഥ വകുപ്പ് ജാഗ്രത നിര്ദേശങ്ങള് പുറപ്പെടുവിച്ചു. മലപ്പുറം, കോഴിക്കോട്, വയനാട്, കണ്ണൂര്, കാസര്കോട് ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്. മലപ്പുറം, കോഴിക്കോട്, വയനാട് ജില്ലകളില് മഴ തീവ്രമാകാനുള്ള സാധ്യത കണക്കിലെടുത്ത് കലക്ടര്മാര് അവധി പ്രഖ്യാപിച്ചതിനാല് വിദ്യാഭ്യാസ സ്ഥാപനങ്ങള് 
അടഞ്ഞുകിടക്കുകയാണ്. വടക്കന് ജില്ലകളില് ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്. 24 മണിക്കൂറില് 64.5 മില്ലിമീറ്ററില് മുതല് 115.5 മില്ലിമീറ്റര് വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അര്ഥമാക്കുന്നത്.
കുറഞ്ഞ സമയം കൊണ്ട് വലിയ മഴയുണ്ടാകുന്ന പ്രവണതയാണ് പ്രതീക്ഷിക്കുന്നത്. അത് മലവെള്ളപ്പാച്ചിലും മിന്നല് പ്രളയങ്ങളും സൃഷ്ടിച്ചേക്കാം. നഗരപ്രദേശങ്ങളിലും പൊതുവെ 
താഴ്ന്ന പ്രദേശങ്ങളിലും വെള്ളക്കെട്ട് രൂപപ്പെടാനും സാധ്യതയുണ്ട്. മഴ തുടരുന്ന സാഹചര്യം മണ്ണിടിച്ചിലും ഉരുള്പൊട്ടലും സൃഷ്ടിച്ചേക്കാം. പൊതുജനങ്ങളും സര്ക്കാര് സംവിധാനങ്ങളും ജാഗ്രത പാലിക്കണം.
തെക്കന് ഗുജറാത്ത് തീരം മുതല് മധ്യകേരളം വരെ സമുദ്രനിരപ്പില് തീരദേശ ന്യൂനമര്ദപാത്തി തുടരുന്നതാണ് മഴ സാധ്യത വര്ധിപ്പിക്കുന്നത്. കേരള-കര്ണാടക-ലക്ഷദ്വീപ് തീരങ്ങളില് മത്സ്യബന്ധനം ഒഴിവാക്കാനും നിര്ദ്ദേശമുണ്ട്.
