പത്തനംതിട്ട: മദ്യപിച്ച് ലക്കുകെട്ട് പോലീസ് വാഹനം ഓടിച്ച സംഭവത്തില് മൂന്ന് 
ഉദ്യോഗസ്ഥര്ക്ക് സസ്പെന്ഷന്. പത്തനംതിട്ട ഡിവൈഎസ്പിക്ക് കീഴിലെ ഡാന്സാഫ് സംഘത്തിലുള്ള ഉദ്യോഗസ്ഥരെയാണ് സസ്പെന്റ് ചെയ്തത്. പത്തനംതിട്ട ജില്ലാ പോലീസ് മേധാവിയാണ് ഇവര്ക്കെതിരെ നടപടി സ്വീകരിച്ചത്. ജില്ലാ പോലീസ് മേധാവി നേരിട്ട് നിയന്ത്രിക്കുന്ന ലഹരി വേട്ട സംഘമാണ് ഡാന്സാഫ്.
സുമന്, പ്രിയേഷ്, രാഹുല് എന്നീ സിവില് പോലീസ് ഓഫീസര്ക്കെതിരെയാണ് നടപടി. പ്രിയേഷ് ആണ് വാഹനം ഓടിച്ചിരുന്നത്. മദ്യപിച്ച് ഓടിക്കുന്നത് ശ്രദ്ധയില്പെട്ട നാട്ടുകാര് വാഹനം തടയുകയായിരുന്നു. നാട്ടുകാര് തടഞ്ഞതോടെ പ്രിയേഷ് ഒഴികെയുള്ള 
പോലീസുകാര് ജീപ്പില് നിന്ന് ഇറങ്ങി ഓടി. ലക്കുകെട്ട പോലീസുകാരന് സീറ്റില് കിടന്നാണ് വാഹനം ഓടിച്ചതെന്നാണ് നാട്ടുകാര് പറയുന്നത്. അപകടങ്ങള് ഒഴിവായത് തലനാരിഴയ്ക്കാണെന്നും ഇവര് പറയുന്നു.
ഓപ്പറേഷന് തൂഫാന് തുടരുന്നിതിനിടെ ലഹരിവിരുദ്ധ സ്വാക്വാഡിലെ സിവില് പോലീസ് ഓഫീസര്മാരുടെ നടപടി സേനയ്ക്ക് നാണക്കേട് ഉണ്ടാക്കിയെന്നാണ് വിലയിരുത്തല്. ഇതേതുടര്ന്ന് അടിയന്തര നടപടി സ്വീകരിക്കുകയായിരുന്നു. അര്ധരാത്രി തന്നെ എസ്പി മൂന്നു പേരേയും സസ്പെന്റ് ചെയ്തു.
