വടകര: വടകരയുടെ നീതിനിര്വഹണ ചരിത്രത്തില് പുതിയൊരു അധ്യായം കുറിച്ചുകൊണ്ട് കുടുംബകോടതി മന്ദിരം ഉദ്ഘാടനസജ്ജമായി. മാര്ച്ച് ഒന്ന് ഞായറാഴ്ച വൈകുന്നേരം നാലിന് മുഖ്യമന്ത്രി പിണറായി വിജയന് കോടതി സമുച്ചയം നാടിനു 
സമര്പിക്കും.
വടകര ടൗണില് അഞ്ചുവിളക്കിനും ഗാന്ധി പ്രതിമയ്ക്കും സമീപമാണ് അത്യാധുനിക സൗകര്യങ്ങളോടെയുള്ള മന്ദിരം. നാടിന്റെയും അഭിഭാഷക സമൂഹത്തിന്റെയും ദീര്ഘകാലത്തെ സ്വപ്നമാണ് ഇവിടെ യാഥാര്ഥ്യമാകുന്നത്.
ദമ്പതികള്ക്കിടയിലെയും കുടുംബങ്ങള്ക്കിടയിലെയും കുട്ടികളുടെയും പ്രശ്നങ്ങള്ക്ക് നിയമവും കരുണയും സമന്വയിപ്പിച്ചുള്ള പരിഹാരമുണ്ടാക്കാന് ലക്ഷ്യമിട്ടാണ് കുടുംബ കോടതി സംവിധാനം വിഭാവനം ചെയ്തിരിക്കുന്നത്.
ഒമ്പത് കോടി രൂപ ചെലവില് പണിത ബഹുനില കെട്ടിടത്തില് കോടതി നടപടികള്ക്കുള്ള 
സൗകര്യത്തിനു പുറമെ, അഭിഭാഷകര്ക്കായി വിപുലമായ ലൈബ്രറി, അസോസിയേഷന് ഹാള് എന്നിവയും സജ്ജമാക്കിയിട്ടുണ്ട്.
ഉദ്ഘാടന ചടങ്ങില് ജനപ്രതിനിധികള്, ന്യായാധിപന്മാര്, രാഷ്ട്രീയ-സാമൂഹിക നേതാക്കള് തുടങ്ങി സമൂഹത്തിന്റെ നാനാതുറകളിലുള്ളവര് സംബന്ധിക്കും.
പദ്ധതിയുടെ തുടക്കം മുതല് അക്ഷീണം പരിശ്രമിച്ച മുന് എംഎല്എ അഡ്വ.എം.കെ.പ്രേംനാഥ്, അഡ്വ. എം.കെ.പ്രഭാകരന്, അഡ്വ.കെ.രഘുനാഥ്, അഡ്വ.പി.എം.സോമസുന്ദരന് തുടങ്ങിയവരുടെ സ്മരണയ്ക്ക് മുന്നില് ബാര് 
അസോസിയേഷന് ആദരവ് അര്പ്പിച്ചുകൊണ്ട് നിലവിലെ ബാര് അസോസിയേഷന് പ്രസിഡന്റ് അഡ്വ. കെ.എം. രാംദാസിന്റെ നേതൃത്വത്തിലുള്ള കമ്മിറ്റിയാണ് ഉദ്ഘാടനത്തിനുള്ള വിപുലമായ ഒരുക്കങ്ങള്ക്ക് നേതൃത്വം നല്കുന്നത്.
മുന് പ്രസിഡന്റുമാരായ ഇ.നാരായണന് നായര്, ഇ.എം.ബാലകൃഷ്ണന്, ഇ.കെ.നാരായണന്, കെ.വി. ശശിധരന്, അബ്ദുള്ള മണപ്പുറത്ത്, എ.സനൂജ് എന്നിവരും പ്രവര്ത്തനങ്ങളില് സജീവമായി രംഗത്തുണ്ട്.
