ന്യൂജേഴ്സി: ഫിഫ ലോകകപ്പിന്റെ പ്രീ-ക്വാര്ട്ടറില് നോര്വേയോട് തോറ്റ് ബ്രസീല് പുറത്തായതിന് പിന്നാലെ ബ്രസീലിയന് സൂപ്പര് താരം നെയ്മര് ജൂനിയര് അന്താരാഷ്ട്ര 
ഫുട്ബോളില് നിന്ന് വിരമിക്കല് പ്രഖ്യാപിച്ചു. ന്യൂജേഴ്സിയിലെ മെറ്റ്ലൈഫ് സ്റ്റേഡിയത്തില് നടന്ന മത്സരത്തില് ഒന്നിനെതിരെ രണ്ട് ഗോളുകള്ക്കാണ് നോര്വേ ബ്രസീലിനെ അട്ടിമറിച്ചത്.
മത്സരത്തിന്റെ അവസാന വിസില് മുഴങ്ങിയതിന് പിന്നാലെ നെയ്മര് കളിക്കളത്തില് ഇരുന്ന് പൊട്ടിക്കരഞ്ഞു. സഹതാരങ്ങള് ചേര്ന്നാണ് അദ്ദേഹത്തെ ആശ്വസിപ്പിച്ചത്.
‘ഞാന് പരമാവധി ശ്രമിച്ചു, ശ്രമിച്ചുകൊണ്ടേയിരുന്നു. എന്നാല് ഇപ്പോള് എല്ലാം 
അവസാനിച്ചിരിക്കുന്നു. ഇതേ സ്റ്റേഡിയത്തിലാണ് ഞാന് തുടങ്ങിയത്, ഇവിടെത്തന്നെ ഇത് അവസാനിപ്പിക്കുന്നു.’ എന്ന് മത്സരശേഷം അദ്ദേഹം മാധ്യമങ്ങളോട് പറഞ്ഞു. (2010ല് യു.എസ്.എയ്ക്ക് എതിരെ ഇതേ മെറ്റ്ലൈഫ് സ്റ്റേഡിയത്തിലാണ് നെയ്മര് ബ്രസീലിനായി അരങ്ങേറ്റ മത്സരവും ആദ്യ ഗോളും കുറിച്ചത്).
പരിക്കിനെത്തുടര്ന്ന് ഈ ലോകകപ്പിലെ ആദ്യ മത്സരങ്ങളില് സബ്സ്റ്റിറ്റിയൂട്ട് ആയി മാത്രം കളിച്ച നെയ്മര്, നോര്വേക്കെതിരായ മത്സരത്തിലും പകരക്കാരനായാണ് ഇറങ്ങിയത്. മത്സരത്തിന്റെ ഇന്ജുറി ടൈമില് (90+10′ മിനിറ്റില്) ബ്രസീലിനായി പെനാല്റ്റിയിലൂടെ ഒരു 
ഗോള് മടക്കിയെങ്കിലും ടീമിനെ രക്ഷിക്കാന് അത് മതിയായില്ല. നോര്വേയ്ക്ക് വേണ്ടി ഏര്ലിങ് ഹാലണ്ട് നേടിയ ഇരട്ട ഗോളുകളാണ് ബ്രസീലിന്റെ ലോകകപ്പ് മോഹങ്ങള് തകര്ത്തത്.
ബ്രസീല് ഫുട്ബോള് ചരിത്രത്തിലെ ഏറ്റവും മികച്ച താരങ്ങളില് ഒരാളായ നെയ്മര് റെക്കോര്ഡുകളുടെ വലിയൊരു സമ്പാദ്യവുമായാണ് കളം വിടുന്നത്.
പെലെയ്ക്കു ശേഷം ബ്രസീല് ഫുട്ബോളിന്റെ അടുത്ത സൂപ്പര് താരമെന്ന ഖ്യാതിയോടെ എത്തി 2010ല് സീനിയര് ടീമില് അരങ്ങേറ്റം കുറിച്ച നെയ്മര് 129 അന്താരാഷ്ട്ര മത്സരങ്ങളില് നിന്ന് 80 ഗോളുകളോടെ ബ്രസീലിന്റെ എക്കാലത്തെയും മികച്ച ഗോള്വേട്ടക്കാരനായാണ് കളിമുറ്റത്തു നിന്ന് പടിയിറങ്ങുന്നത്. നാല് ഫിഫ ലോകകപ്പുകളിലായി ഒരു 
പതിറ്റാണ്ടിലേറെക്കാലം അദ്ദേഹം ബ്രസീലിയന് ഫുട്ബോളിന്റെ മുഖമായിരുന്നു. ലോക കിരീടം തിരിച്ചുപിടിക്കാന് കൊതിച്ച ഒരു രാജ്യത്തിന്റെ മുഴുവന് പ്രതീക്ഷകളും ആ ചുമലുകളിലായിരുന്നു. ലോകകപ്പ് കിരീടം അദ്ദേഹത്തിന് നേടാനായില്ലെങ്കിലും അന്താരാഷ്ട്ര വേദിയില് അവിസ്മരണീയമായ നിരവധി നിമിഷങ്ങള് നെയ്മര് സമ്മാനിച്ചിട്ടുണ്ട്. 2013ല് ഫിഫ കോണ്ഫെഡറേഷന്സ് കപ്പ് നേടിയ അദ്ദേഹം 2012ലെ ലണ്ടന് ഒളിംപിക്സില് വെള്ളി നേടിയതിന് ശേഷം 2016ല് റിയോയില് സ്വന്തം മണ്ണില് ബ്രസീലിനെ ഒളിംപിക് സ്വര്ണത്തിലേക്ക് നയിച്ചു.
പരിക്കുകള് നിരന്തരം വേട്ടയാടിയതായിരുന്നു അദ്ദേഹത്തിന്റെ കരിയര്. വലിയ ടൂര്ണമെന്റുകളില് പരിക്ക് അദ്ദേഹത്തെ നിരന്തരം അലോസരപ്പെടുത്തി വഴി തടഞ്ഞു.
