വടകര: ഏറാമല പഞ്ചായത്ത് ഒന്നാം വാര്‍ഡിലെ തട്ടോളിക്കര മുണ്ടങ്ങാട്ടു താഴെ തണ്ണീര്‍ത്തടങ്ങളും തോടുകളും വ്യാപകമായി 
മണ്ണിട്ട് നികത്തുന്നതിനെതിരെ ബിജെപി രംഗത്ത്. നികത്തിയ മണ്ണ് ബിജെപി പ്രവര്‍ത്തകര്‍ തിരികെ കോരിയെടുപ്പിച്ചു.
പ്രദേശത്തെ ഹെക്ടര്‍ കണക്കിന് ഭൂമിയാണ് ഭൂമാഫിയ കൈക്കലാക്കിയിരിക്കുന്നത്. ഭൂമി നികത്തുന്നതിനെതിരെ പലതവണ പ്രദേശ വാസികള്‍ പ്രതിഷേധിച്ചെങ്കിലും ഫലമുണ്ടായില്ല. തുടര്‍ന്നാണ് ബിജെപി രംഗത്തെത്തിയത്. വെള്ളിയാഴ്ച കാലത്ത് വീണ്ടും ജെസിബിയുമായി എത്തിയ സ്ഥലമുടമയ്ക്ക് ബിജെപി പ്രവര്‍ത്തകര്‍ക്കു മുമ്പില്‍ മുട്ടുമടക്കേണ്ടി വന്നു. നികത്തിയ സ്ഥലത്തെ 
കല്ലും മണ്ണും ജെസിബി വെച്ചു കോരിയെടുപ്പിച്ചു.
വിവരമറിഞ്ഞ് വടകര ആര്‍ഡിഒ, ഏറാമല വില്ലേജ് ഓഫീസര്‍ എന്നിവര്‍ സ്ഥലത്തെത്തി. അനധികൃത പ്രവൃത്തിക്കെതിരെ നടപടി സ്വീകരിക്കുമെന്ന് ആര്‍ഡിഒ ബിജെപി പ്രവര്‍ത്തകര്‍ക്ക് ഉറപ്പു നല്‍കി.
ബിജെപി ഒഞ്ചിയം മണ്ഡലം ജനറല്‍ സെക്രട്ടറി അഭിജിത്ത്.കെ.പി, ഓര്‍ക്കാട്ടേരി ഏരിയ ജനറല്‍ സെക്രട്ടറി രമേഷ്‌കുമാര്‍.എം.എം, ബൂത്ത് പ്രസിഡന്റ് ജിജേഷ്.വി.കെ, വിമേഷ്.എന്‍.കെ, റെന്നി. പി.കെ, പ്രവീണ്‍.കെ, സുബീഷ് തിരുവോത്ത്, ജിജേഷ് വലിയ കുനിയില്‍ തുടങ്ങിയവര്‍ നേതൃത്വം നല്‍കി.
