അറ്റ്ലാന്റ: പരാജയത്തിനടുത്ത് നിന്ന് പോരാട്ട വീര്യത്തിന്റെ കരുത്തുമായി മുന്നേറിയ അര്ജന്റീന പ്രീക്വാര്ട്ടറില് അവിശ്വസനീയ വിജയം സന്തമാക്കി. ഈജിപ്തിനെതിരെ 
തകര്പ്പന് തിരിച്ചുവരവോടെ 3-2 എന്ന സ്കോറിന് വിജയിച്ച് അര്ജന്റീന ക്വാര്ട്ടര് ഫൈനലില് പ്രവേശിച്ചു. രണ്ട് ഗോളുകള്ക്ക് പിന്നിലായ ശേഷമാണ് നിലവിലെ ചാമ്പ്യന്മാര് അവസാന മിനിറ്റുകളില് മൂന്ന് ഗോളുകള് തിരിച്ചടിച്ച് ആവേശകരമായ വിജയം കൈപ്പിടിയിലാക്കിയത്.
മത്സരത്തിന്റെ 15-ാം മിനിറ്റില് മര്വാന് ആറ്റിയയുടെ കോര്ണറില് നിന്ന് മികച്ചൊരു ഹെഡ്ഡറിലൂടെ യാസര് ഇബ്രാഹിം ഈജിപ്തിനെ മുന്നിലെത്തിച്ചു. ഇതിനു പിന്നാലെ 20-ാം മിനിറ്റില് അര്ജന്റീനയ്ക്ക് അനുകൂലമായി പെനാല്റ്റി ലഭിച്ചെങ്കിലും ക്യാപ്റ്റന് ലയണല് 
മെസ്സിയുടെ കിക്ക് ഈജിപ്ത് ഗോള്കീപ്പര് മുസ്തഫ ഷൊബൈര് മനോഹരമായി തടുത്തു. ഈജിപ്ത് നേടിയ ഒരു ഗോളിന്റെ ലീഡുമായാണ് ആദ്യപകുതി അവസാനിച്ചത്. മത്സരത്തിന്റെ 67-ാം മിനിറ്റില് ലഭിച്ച തകര്പ്പന് കൗണ്ടര് അറ്റാക്കിലൂടെ മുസ്തഫ സിക്കോ ഈജിപ്തിന്റെ രണ്ടാം ഗോള് നേടി അര്ജന്റീനയെ ഞെട്ടിച്ചു. അതിനുമുമ്പ് സിക്കോ അടിച്ച മറ്റൊരു ഗോള് വാര് പരിശോധനയിലൂടെ റഫറി നിഷേധിച്ചിരുന്നു. ഏകപക്ഷീയമായി ഈജിപ്ത് വിജയം സ്വന്തമാക്കുമെന്ന് കരുതിയിരിക്കുമ്പോഴാണ് ലോകചാമ്പ്യന്മാരുടെ മാന്ത്രിക തിരിച്ചുവരവ്. അവസാന 15 മിനിറ്റുകളിലാണ് മത്സരത്തിന്റെ ഗതി മാറിയത്. ലയണല് 
മെസ്സിയുടെ ക്രോസില് നിന്ന് പവര്ഫുള് ഹെഡ്ഡറിലൂടെ ഡിഫന്ഡര് റൊമേറോ അര്ജന്റീനയുടെ ആദ്യ ഗോള് മടക്കി. ആദ്യ പകുതിയിലെ പെനാല്റ്റി പിഴവിന് പ്രായശ്ചിത്തം ചെയ്തുകൊണ്ട് മെസ്സി അര്ജന്റീനയ്ക്ക് ഒപ്പമെത്താനുള്ള സമനില ഗോള് നേടി. ഇന്ജുറി ടൈമിന്റെ രണ്ടാം മിനിറ്റില് എന്സോ ഫെര്ണാണ്ടസ് അര്ജന്റീനയുടെ വിജയഗോള് വലയിലാക്കി ടീമിന് ക്വാര്ട്ടര് ഫൈനല് ടിക്കറ്റ് ഉറപ്പാക്കി.
ഈജിപ്ഷ്യന് ഗോള്കീപ്പര് മുസ്തഫ ഷൊബൈറിന്റെ മികച്ച സേവുകളും പോരാട്ടവീര്യവും കളിയിലുടനീളം ശ്രദ്ധേയമായിരുന്നെങ്കിലും അവസാന നിമിഷങ്ങളിലെ അര്ജന്റീനയുടെ ആക്രമണങ്ങള്ക്ക് മുന്നില് അവര്ക്ക് കീഴടങ്ങേണ്ടി വന്നു.
