വടകര: ജില്ലാ ആശുപത്രിയില് പ്രവര്ത്തിക്കുന്ന രക്ത ബാങ്കിന്റെ പ്രവര്ത്തനം തടസ്സമില്ലാതെ മുന്നോട്ട് കൊണ്ടുപോകുന്നതിനുള്ള നിര്ണായക അനുമതി കേന്ദ്ര
സര്ക്കാരിന്റെ ഡയറക്ടറേറ്റ് ജനറല് ഓഫ് ഹെല്ത്ത് സര്വീസസില് (ഡിജിഎച്ച്എസ്) നിന്നു ലഭ്യമായതായി ഷാഫി പറമ്പില് എംപിയുടെ ഓഫീസ് അറിയിച്ചു. ആശുപത്രി അധികൃതരുടെ അഭ്യര്ഥന പ്രകാരം ഷാഫി പറമ്പില് എംപി കേന്ദ്ര ആരോഗ്യ മന്ത്രാലയവുമായി നടത്തിയ നിരന്തരമായ ആശയവിനിമയങ്ങളുടെ ഫലമായാണ് 2029 ജൂലൈ മാസം വരെ (5 വര്ഷത്തേക്ക്) രക്ത ബാങ്കിന്റെ ലൈസന്സ് പുതുക്കിക്കൊണ്ടുള്ള ഉത്തരവ് ഇപ്പോള് പുറത്തുവന്നിരിക്കുന്നത്. 2024 ജൂലൈ മുതല് ലൈസന്സ് പുതുക്കി ലഭിക്കുന്നതിനായി കാത്തിരുന്ന അനുമതിയാണ് എംപിയുടെ ഇടപെടലിലൂടെ ഇപ്പോള് യാഥാര്ഥ്യമായിരിക്കുന്നത്. കാന്സര് രോഗ ചികിത്സയ്ക്കടക്കം അത്യന്താപേക്ഷിതമായ രക്ത ഘടകങ്ങളുടെ പരിശോധനയും വേര്തിരിക്കലും നടത്താനാവശ്യമായ അത്യാധുനിക യന്ത്രസാമഗ്രികളും മറ്റു സജ്ജീകരണങ്ങളും വടകര ജില്ലാ ആശുപത്രിയില് നേരത്തെ തന്നെ ലഭ്യമായിരുന്നു. എന്നാല് അടിസ്ഥാന ലൈസന്സ് പുതുക്കി ലഭിക്കാതിരുന്നതിനാല് ഈ ഉപകരണങ്ങള് ഉപയോഗിക്കാനോ രക്ത ബാങ്കിന്റെ വിപുലീകരണ പ്രവര്ത്തനങ്ങള് മുന്നോട്ട് കൊണ്ടുപോകാനോ സാധിക്കാത്ത വിധം പ്രവര്ത്തനങ്ങള് തടസ്സപ്പെട്ടുകിടക്കുകയായിരുന്നു. വിഷയത്തിന്റെ ഗൗരവം ഉള്ക്കൊണ്ട് എംപി കേന്ദ്ര ആരോഗ്യവകുപ്പിന്റെ ശ്രദ്ധയില് ഈ വിഷയം അടിയന്തരമായി എത്തിക്കുകയും തുടര്നടപടികള് വേഗത്തിലാക്കാന് സമ്മര്ദം ചെലുത്തുകയുമായിരുന്നു. പുതിയ സംവിധാനം പൂര്ണതോതില് പ്രവര്ത്തനക്ഷമമാകുന്നതോട വടകരയിലെയും പരിസരപ്രദേശങ്ങളിലെയും സാധാരണക്കാരായ നൂറുകണക്കിന് രോഗികള്ക്ക് ഇത് വലിയ അനുഗ്രഹമാകും. കാന്സര് രോഗികള് അടക്കമുള്ളവര്ക്ക് വന് തുക മുടക്കി സ്വകാര്യ ആശുപത്രികളുടെയും ലാബുകളുടെയും സേവനം തേടേണ്ടി വന്ന ദുരിതാവസ്ഥയ്ക്കാണ് എംപിയുടെ ഇടപെടലിലൂടെ പരിഹാരമായിരിക്കുന്നത്.
- Latest
- Trending
