പൊന്നാനി: പൊന്നാനിയില് കടപ്പുറത്ത് യുവതിയായ ഫാത്തിമ (22) മരിച്ച നിലയില് കണ്ടെത്തിയ സംഭവത്തില് ഭര്ത്താവ് കസ്റ്റഡിയില്. ഫാത്തിമയുടെ മരണം 
കൊലപാതകമെന്ന് സ്ഥിരീകരിച്ച പോലീസ് ഭര്ത്താവ് മുഹമ്മദിനെ കസ്റ്റഡിയില് എടുത്തു. ട്രെയിനിന് മുന്നില് ചാടാനുള്ള ശ്രമത്തിനിടെ പരപ്പനങ്ങാടി റെയില്വേ ട്രാക്കിനു സമീപത്തു നിന്നാണ് ഇയാളെ കസ്റ്റഡിയില് എടുത്തത്. സംശയം മൂലമാണ് ഭാര്യയെ കൊലപ്പെടുത്തിയതെന്നും ഇയാള് ലഹരിക്കടിമയാണെന്നും പോലീസ് പറയുന്നു.
മുഹമ്മദും ഭാര്യ ഫാത്തിമയും തമ്മില് നിരന്തരം തര്ക്കം നടന്നിരുന്നുവെന്നു പോലീസ് പറഞ്ഞു. ബുധനാഴ്ച രാവിലെയാണ് ഫാത്തിമയെ പൊന്നാനി ഹാര്ബര് പരിസരത്ത് മരിച്ച 
നിലയില് കണ്ടെത്തിയത്. മണലില് കമിഴ്ന്ന് കിടക്കുന്ന രീതിയിലായിരുന്നു മൃതദേഹം. ഇതിന് മുകളില് മണല്വാരിയിടുകയും ചെയ്തിരുന്നു.
ഒന്നര വര്ഷം മുന്പായിരുന്നു ഇരുവരുടെയും വിവാഹം. ഇവര്ക്കു നാലുമാസം പ്രായമുള്ള കുഞ്ഞുണ്ട്. മൃതദേഹം കണ്ട നാട്ടുകാര് പോലീസിനെ വിവരം അറിയിക്കുകയായിരുന്നു. സംഭവത്തിന് പിന്നാലെ ഒളിവില് പോയ മുഹമ്മദിനായി പോലീസ് തിരച്ചില് ഊര്ജിതമാക്കിയിരുന്നു. ഇതിന് പിന്നാലെയാണ് പരപ്പനങ്ങാടിയില് നിന്ന് ഇയാളെ പിടികൂടുന്നത്.
