കുറ്റ്യാടി: കുന്നുമ്മല്‍ ഉപജില്ലാ കലോത്സവം കൊടിയിറങ്ങാന്‍ മണിക്കൂറുകള്‍ ബാക്കി നില്‍ക്കെ വേദികളെല്ലാം ആവേശക്കടലായി. കലോത്സവത്തിലെ ഏറ്റവും ജനപ്രിയ ഇനമായ 
ഒപ്പന കാണാന്‍ രണ്ടാം വേദിയില്‍ സ്ത്രീകളടക്കമുള്ള ആസ്വാദകര്‍ മണിക്കൂറുകള്‍ക്ക് മുന്‍പ് തന്നെ സ്ഥാനം പിടിച്ചിരുന്നു.
യുപി വിഭാഗം ഒപ്പന ആരംഭിക്കുന്നതിന് മുമ്പേ സദസ്സില്‍ ഉള്‍ക്കൊള്ളാവുന്നതിലധികം ആളുകള്‍ തിങ്ങിനിറഞ്ഞു. ഇതോടെ പ്രേക്ഷകരുടെ ആവശ്യം പരിഗണിച്ച് സംഘാടകര്‍ മത്സരം വിശാലമായ പ്രധാന വേദിയായ ഒന്നിലേക്ക് മാറ്റാന്‍ തീരുമാനിച്ചു. അറിയിപ്പ് 
വന്നതോടെ ആസ്വാദകര്‍ കൂട്ടത്തോടെ ഒന്നിലേക്ക് ഒഴുകിയെത്തി.
മണവാട്ടിയും തോഴിമാരും അണിനിരന്ന്, വര്‍ണാഭമായ വേഷവിധാനങ്ങളോടെ ഒപ്പനയ്ക്ക് തുടക്കമായപ്പോള്‍ തിങ്ങിനിറഞ്ഞ സദസ്സ് നിറഞ്ഞ കൈയ്യടികളോടെയാണ് കലാകാരികളെ വരവേറ്റത്. കലോത്സവത്തിന്റെ സമാപന മണിക്കൂറുകളെ അക്ഷരാര്‍ത്ഥത്തില്‍ ആവേശഭരിതമാക്കുന്നതായിരുന്നു ഒന്നാം വേദിയിലെ ഈ ഒപ്പന വിരുന്ന്.
-ഇ.ആനന്ദന്‍
