വടകര: തോടന്നൂര്‍ ഉപജില്ലാ സ്‌കൂള്‍ കലോത്സവത്തില്‍ ക്രമക്കേട് നടന്നെന്ന പരാതിയുമായി വിദ്യാര്‍ഥിനി രംഗത്ത്. വടകര ഉപജില്ലയില്‍പെട്ട ഒരു പെണ്‍കുട്ടി സ്‌കൂള്‍ മാറിയെത്തി തോടന്നൂര്‍ ഉപജില്ലാ കലോത്സവത്തില്‍ പങ്കെടുത്തെന്നാണ് മേമുണ്ട ഹയര്‍സെക്കന്‍ഡറി 
സ്‌കൂളിലെ പ്ലസ് വണ്‍ വിദ്യാര്‍ഥിനി അഭിരാമിയുടെ പരാതി.
നവംബര്‍ ഒമ്പതു വരെ വടകര സബ്ജില്ലയിലെ പുതിയാപ്പ് ഗവ. സംസ്‌കൃതം ഹയര്‍സെക്കന്ററി സ്‌കൂളില്‍ പ്ലസ് വണ്‍ ബയോളജി സയന്‍സിന് പഠിച്ച പെണ്‍കുട്ടി നവംബര്‍ 10 ന് സ്‌പെഷല്‍ ഓര്‍ഡര്‍ പ്രകാരം തിരുവള്ളൂര്‍ ശാന്തിനികേതന്‍ ഹയര്‍സെക്കന്‍ഡറി സ്‌കൂളില്‍ ചേരുകയും പിറ്റേന്ന് നടന്ന തോടന്നൂര്‍ ഉപജില്ല എച്ച്എസ്എസ് വിഭാഗം മോഹിനിയാട്ടം, കുച്ചിപ്പുടി എന്നീ ഇനങ്ങളില്‍ മത്സരിക്കുകയും ഒന്നാം സ്ഥാനം നേടുകയും ചെയ്‌തെന്നാണ് പരാതി.
ഒക്ടോബര്‍ 31 നായിരുന്നു തോടന്നൂര്‍ ഉപജില്ലയിലെ കലോത്സവത്തിന് പേര് രജിസ്റ്റര്‍ 
ചെയ്യാനുള്ള അവസാന തിയ്യതി എന്നിരിക്കെ എങ്ങനെയാണ് ഈ വിദ്യാര്‍ഥിനിക്ക് മത്സരത്തില്‍ പങ്കെടുക്കാന്‍ കഴിഞ്ഞതെന്നാണ് ചോദ്യം. ഒക്ടോബര്‍ 31ന് ഈ കുട്ടി വടകര ഉപജില്ലയിലെ സംസ്‌കൃതം സ്‌കൂളിലാണ് പഠിച്ചിരുന്നത്. മാത്രമല്ല സ്‌കൂള്‍തല കലോത്സവത്തില്‍ രണ്ടാം സ്ഥാനത്തായതിന് ഈ വിദ്യാര്‍ഥിനി വടകര എഇഒവിന് അപ്പീല്‍ നല്‍കിയ കാര്യവും മേമുണ്ട സ്‌കൂള്‍ വിദ്യാര്‍ഥിനി അഭിരാമി തന്റെ പരാതിയില്‍ ചൂണ്ടിക്കാട്ടുന്നു.
വടകര എഇഒവിന് നല്‍കിയ അപ്പീല്‍ നിലനില്‍ക്കെയാണ് ഭരണകക്ഷിയുടെ സ്വാധീനത്തില്‍ അനധികൃതമായി സ്‌പെഷല്‍ ഓഡര്‍ സമ്പാദിച്ച് തിരുവള്ളൂര്‍ ശാന്തിനികേതന്‍ സ്‌കൂളില്‍ 
ചേരുകയും പിറ്റേന്ന് തോടന്നൂര്‍ ഉപജില്ലാ കലോത്സവത്തില്‍ പങ്കെടുക്കുകയും ചെയ്തതെന്നാണ് ആക്ഷേപം. പ്രോഗ്രാം കമ്മിറ്റിയെ അനധികൃതമായി സ്വാധീനിച്ചാണ് ഈ കുട്ടിയെ മത്സരത്തില്‍ ഉള്‍പ്പെടുത്തിയെന്നാണ് പരാതി. ഈ കാര്യങ്ങള്‍ കാണിച്ച് കൃത്യമായ നടപടി എടുക്കണമെന്ന് ആവശ്യപ്പെട്ട് അഭിരാമി തോടന്നൂര്‍ എഇഒ, വടകര ഡിഇഒ, കോഴിക്കോട് ഡിഡി എന്നിവര്‍ക്ക് പരാതി നല്‍കി. ഇതില്‍ അന്വേഷണവും നടപടിയും ഉണ്ടായില്ലെങ്കില്‍ കോടതി നടപടികളുമായി മുന്നോട്ട് പോകുമെന്ന് അഭിരാമി വ്യക്തമാക്കി.
അതേ സമയം പരാതി കിട്ടിയിട്ടുണ്ടെന്നു തോടന്നൂര്‍ എഇഒ വി.എം.സുരേന്ദ്രന്‍ അറിയിച്ചു. തിരക്കായതിനാനാല്‍ വിഷയം പരിശോധിക്കാന്‍ കഴിഞ്ഞിട്ടില്ലെന്നും പ്രോഗ്രാം കമ്മിറ്റിയുമായി ബന്ധപ്പെട്ട ശേഷം നടപടി കൈക്കൊള്ളുമെന്നും അദ്ദേഹം പറഞ്ഞു.
