വടകര: അധ്യാപികമാര്‍ പ്രതികളായ എംഡിഎംഎ സാമ്പത്തിക ഇടപാട് കേസില്‍ ജുഡീഷ്യല്‍ കസ്റ്റഡിയില്‍ കഴിയുന്ന രണ്ട് പ്രതികളെ വടകര പോലീസ് കസ്റ്റഡിയില്‍ വാങ്ങി. പേരാമ്പ്ര മേഞ്ഞാണ്യം സ്വദേശി കരേപൊയില്‍ ഫിറോസ് (28), കൂത്താളി സ്വദേശി
ചെമ്പനോട് പൊയില്‍ അനസ് (26)എന്നിവരെയാണ് വടകര എന്‍ഡിപിഎസ് കോടതി ജഡ്ജ് അന്യാസ് തയ്യില്‍ രണ്ടു ദിവസത്തെ പോലീസ് കസ്റ്റഡിയില്‍ വിട്ടത്. മൂന്നു ദിവസത്തെ കസ്റ്റഡി അപേക്ഷയാണ് പോലീസ് നല്‍കിയത്. ശനി വൈകീട്ട് അഞ്ചു മണിക്ക് മുന്‍പായി പ്രതികളെ കോടതിയില്‍ തിരികെ ഹാജരാക്കണം. കേസുമായി ബന്ധപ്പെട്ട് കൂടുതല്‍ ചോദ്യം ചെയ്യേണ്ട ആവശ്യത്തിലേക്കാണ് ഈ പ്രതികളെ പോലീസ് കസ്റ്റഡിയില്‍ വാങ്ങിയത്.
പോലീസിനെ അക്രമിച്ച കേസില്‍ ജുഡീഷ്യല്‍ കസ്റ്റഡിയില്‍ കഴിയവെയാണ് വടകര എംഡിഎംഎ കേസില്‍ കൊയിലാണ്ടി സബ് ജയിലിലെത്തി വടകര പോലീസ് അനസിന്റെ അറസ്റ്റ് രേഖപ്പെടുത്തിയത്. എന്നാല്‍ പ്രതിയെ കസ്റ്റഡിയിലെടുത്ത് ചോദ്യം ചെയ്യാന്‍ കഴിഞ്ഞിരുന്നില്ല. ഇതിനായാണ് പോലീസ് കസ്റ്റഡി അപേക്ഷ നല്‍കിയത്.
കൊയിലാണ്ടി സബ് ജയിലില്‍ പ്രതികളുടെ എണ്ണം വര്‍ധിച്ചതിനാല്‍ അനസിനെ രണ്ടു ദിവസം മുന്‍പ് കണ്ണൂര്‍ സെന്‍ട്രല്‍ ജയിലിലേക്ക് മാറ്റിയിരുന്നു. അനസിനെ കണ്ണൂര്‍ സെന്‍ട്രല്‍ ജയിലില്‍ നിന്നും ഫിറോസിനെ വടകര സബ് ജയിലില്‍ നിന്നുമാണ് കോടതിയിലെത്തിച്ചത്. എംഡിഎംഎ കേസിലെ മുഖ്യപ്രതി വയനാട് സ്വദേശി ഷിന്റോ ഷിബുവിനെ ഇതേ വരെ പിടികൂടാന്‍ കഴിഞ്ഞിട്ടില്ല. അനസ്, ഫിറോസ് എന്നിവരെ ചോദ്യം ചെയ്താല്‍ കൂടുതല്‍ വിവരങ്ങള്‍ ലഭിക്കുമെന്ന പ്രതീക്ഷയിലാണ് പോലീസ്. ഈ കേസിലെ ഒന്നു മുതല്‍ അഞ്ചു വരെയുള്ള പ്രതികളായ സഫ്വാന്‍, കീര്‍ത്തന, കാവ്യ, നീഷ്മ, ജിജില്‍ കുര്യാക്കോസ് എന്നിവര്‍ 60 ദിവസം കഴിഞ്ഞതിനാല്‍ ജാമ്യത്തിലിറങ്ങിയിരിക്കുകയാണ്.
- Latest
- Trending
