മേമുണ്ട: പ്രവാസി എഴുത്തുകാരന്‍ റഫീഖ് മേമുണ്ട രചിച്ച കുഞ്ഞിക്കഥകളുടെ സമാഹാരമായ ‘മിന്നല്‍ ജീവിതം’ പ്രകാശനം ചെയ്തു. മേമുണ്ട ഹയര്‍ സെക്കന്‍ഡറി സ്‌കൂളില്‍ 
നടന്ന ചടങ്ങില്‍ പ്രശസ്ത സാഹിത്യകാരന്‍ പി.കെ. പാറക്കടവ് പ്രകാശനം നിര്‍വഹിച്ചു. കവയിത്രി അപര്‍ണ ചിത്രകം ആദ്യപ്രതി ഏറ്റുവാങ്ങി.
ഏതാനും വരികളില്‍ ഒതുങ്ങുന്ന കുഞ്ഞിക്കഥകള്‍ പുതിയ കാലത്തിന്റെ സാഹിത്യരൂപമാണെന്നും ഇത്തരം രചനകള്‍ നവമാധ്യമങ്ങളിലൂടെ ലക്ഷക്കണക്കിന് ആസ്വാദകരിലേക്കാണ് എത്തിച്ചേരുന്നതെന്നും ഉദ്ഘാടന പ്രസംഗത്തില്‍ പി.കെ. പാറക്കടവ് അഭിപ്രായപ്പെട്ടു.
ചടങ്ങില്‍ പി. ഹരീന്ദ്രനാഥ് അധ്യക്ഷത വഹിച്ചു. ഇ.കെ. ദിനേശന്‍ പുസ്തകപരിചയവും പ്രൊഫ. 
രാജേന്ദ്രന്‍ എടത്തുംകര മുഖ്യപ്രഭാഷണവും നടത്തി. ജീവകാരുണ്യ പ്രവര്‍ത്തകന്‍ രഘുനാഥ് വെള്ളാച്ചേരി, പാമ്പ് പിടിത്ത വിദഗ്ധന്‍ സുരേന്ദ്രന്‍ കരിങ്ങാട് എന്നിവരെ ചടങ്ങില്‍ ആദരിച്ചു.
എം. നാരായണന്‍, എം.സി. ഇബ്രാഹിം, എന്‍.ബി. പ്രകാശന്‍, എ.പി. അമര്‍നാഥ്, കെ.ടി. സൂപ്പി, നസീമ അബ്ബാസ്, കെ.ഇ. അപര്‍ണ, നിമിഷ കാര്‍ത്തിക, പി.കെ. ജിതേഷ്, സത്യന്‍ മാടാക്കര, അഹമ്മദ് മൂന്നാംകൈ, ഹാരിസ് അരിക്കുളം, അബ്ദുള്ള മാണിക്കോത്ത്, പി.പി. മുരളി, സി.എച്ച്. പ്രദീപന്‍ തുടങ്ങിയവര്‍ ആശംസകള്‍ നേര്‍ന്നു.
ഗ്രന്ഥകര്‍ത്താവ് റഫീഖ് മേമുണ്ട മറുമൊഴി രേഖപ്പെടുത്തി. ടി.പി. കൃഷ്ണദാസ് സ്വാഗതവും സി.പി. ബിജുപ്രസാദ് നന്ദിയും പറഞ്ഞു.
