വടകര: ഇൻവോൾവ് കൾച്ചറൽ & ചാരിറ്റബിൾ സൊസൈറ്റി നടത്തി വരുന്ന പരിസ്ഥിതി പ്രവർത്തനങ്ങളുടെ പ്രധാന ചുവടുവെയ്പായ ഇൻവോൾവ് ഗ്രീൻ പ്രോജക്ടിന്റെ ഭാഗമായി, വള്ളിക്കാട് വരിശ്യക്കുനി യു പി സ്കൂളിൽ ഒരുങ്ങുന്ന ഗ്രീൻ സ്പേസ്സിനു സമാരംഭമായി. സ്കൂൾ അങ്കണത്തിൽ ഒരുങ്ങുന്ന ഗ്രീൻ സ്പേസ് ഭാവി പ്രവർത്തനങ്ങൾക്ക് വേണ്ടി കുട്ടികൾക്ക് കൈമാറി. മരം നടുക എന്നത് പോലെ തന്നെ പ്രാധാന്യമർഹിക്കുന്നതാണ് അത് പരിപാലിക്കുക എന്ന സന്ദേശം കുരുന്നുകൾ ആവേശപൂർവം ഏറ്റുവാങ്ങി. കുട്ടികളുടെ
![](https://i0.wp.com/vatakaravarthakal.in/wp-content/uploads/2024/02/clearvision.jpg?resize=600%2C600&ssl=1)
കരുതലിൽ ഗ്രീൻ സ്പേസ് വളർന്നു പന്തലിച്ച് സ്കൂൾ അങ്കണത്തിൽ തണൽ വിരിക്കുന്നത് വരെ ഇൻവോൾവ് കൂടെയുണ്ടാവുമെന്നും ഓരോ കുട്ടിയേയും ഗ്രീൻ പ്രോജക്ടിന്റെ സന്ദേശ വാഹകരായി മാറ്റി ഇതിന്റെ തുടർച്ച ഉറപ്പു വരുത്തുമെന്നും ഇൻവോൾവ് ഭാരവാഹികൾ പറഞ്ഞു.ജൂൺ 5 പരിസ്ഥിതി ദിനത്തിൽ സ്കൂളിൽ നടന്ന ചടങ്ങിൽ വെച്ച് ചോറോട് ഗ്രാമ പഞ്ചായത്ത് പ്രസിഡന്റ് പി പി ചന്ദ്രശേഖരൻ പദ്ധതിയുടെ ഉദ്ഘാടനം നിർവഹിച്ചു. സസ്യശാസ്ത്ര ഗവേഷക ഡോ. മിഥു സി കെ കുട്ടികൾക്കായി പരിസ്ഥിതി അവബോധ ക്ലാസ് കൈകാര്യം ചെയ്തു. ഇൻവോൾവ് പ്രസിഡന്റ് ഡോ. സിഷ പാലേരി ഇൻവോൾവ് ഗ്രീൻ പ്രോജക്ടിനെക്കുറിച്ച് ആമുഖ ഭാഷണം നടത്തി. സ്കൂൾ പി ടി എ പ്രസിഡന്റ് എം ഇബ്രാഹിം
![](https://i0.wp.com/vatakaravarthakal.in/wp-content/uploads/2024/05/unani-golbal-e.jpeg?resize=600%2C600&ssl=1)
അധ്യക്ഷത വഹിച്ച ചടങ്ങിൽ ഹെഡ്മാസ്റ്റർ ഇ കെ ജയകുമാർ സ്വാഗതവും സ്കൂൾ നാച്വർ ക്ലബ്ബ് കോഡിനേറ്റർ എസ് ശ്രേയസ് നന്ദിയും പറഞ്ഞു. സ്കൂൾ അങ്കണത്തിൽ ഗ്രീൻ സ്പേസിന് സമാരംഭം കുറിച്ച് കൊണ്ട് ഒന്നാംഘട്ട മരത്തൈകൾ നട്ടു പിടിപ്പിച്ചു. ഗ്രീൻ സ്പെയ്സ് പരിപാലനത്തിനായുള്ള സാമഗ്രികളും ഗ്രീൻ രജിസ്ട്രേഷൻ സർട്ടിഫിക്കറ്റും ഇൻവോൾവ് പ്രതിനിധികൾ സ്കൂൾ ഹെഡ്മാസ്റ്റർക്ക് കൈമാറി. തുടർന്ന് സ്കൂളിലെ മുഴുവൻ വിദ്യാർത്ഥികൾക്കുമായി, പരിസ്ഥിതി വിഷയങ്ങൾ മുൻനിർത്തി ചിത്രരചനാ മത്സരം സംഘടിപ്പിച്ചു. സബ് ജൂനിയർ, ജൂനിയർ, യു പി എന്നിങ്ങനെ മൂന്ന് വിഭാഗങ്ങളിലായി പങ്കെടുത്ത എല്ലാ വിദ്യാർത്ഥികൾക്കും ക്രയോൺസ്, കളർ പെൻസിൽ, വാട്ടർ കളർ ഉൾപ്പെടെ ഇൻവോൾവ് സമ്മാനിച്ചു.