മലപ്പുറം: കല്പകഞ്ചേരിയില് അഞ്ചാം ക്ലാസ് വിദ്യാര്ഥിനിയുടെ കൈ തല്ലിയൊടിച്ച സംഭവത്തില് അധ്യാപകന് അറസ്റ്റില്. വടകര സ്വദേശി ബല്രാജിനെയാണ് കല്പകഞ്ചേരി 
പോലീസ് അറസ്റ്റ് ചെയ്തത്. കല്പകഞ്ചേരി കല്ലിങ്ങല്പ്പറമ്പ് എംഎസ്എംഎച്ച്എസ്എസിലെ കണക്ക് അധ്യാപകനാണ് ബല്രാജ്.
ഇയാള്ക്കെതിരെ ജുവനൈല് ആക്ട് പ്രകാരം കേസെടുത്തിരുന്നു. കുട്ടിയുടെ മൊഴി അടക്കം രേഖപ്പെടുത്തിയ ശേഷം അധ്യാപകനെ വെള്ളിയാഴ്ച തന്നെ പോലീസ് കസ്റ്റഡിയിലെടുത്തിരുന്നു.
ബെഞ്ചിലിരുന്ന് നോട്ടുബുക്കില് എഴുതുമ്പോഴാണ് പിന്നിലൂടെ വന്ന അധ്യാപകന് കുട്ടിയെ ചൂരലുകൊണ്ട് അടിച്ചത്. ക്ലാസില് ശ്രദ്ധിക്കുന്നില്ലെന്ന് ആരോപിച്ചായിരുന്നു അധ്യാപകന്റെ 
ചൂരല് പ്രയോഗം. തുടര്ന്ന് അടിയേറ്റ കൈകൊണ്ട് തന്നെ കുട്ടിയെ ബോര്ഡില് എഴുതിപ്പിച്ചു.
കൈയ്ക്ക് വേദനയുണ്ടെന്ന് കുട്ടി പറഞ്ഞെങ്കിലും ആശുപത്രിയില് കൊണ്ടുപോകാന് അധ്യാപകന് തയാറായില്ല. സംഭവം വലിയ പ്രശ്നമായെന്ന് മനസ്സിലാക്കിയതോടെ അധ്യാപകര് കുട്ടിയെ വീട്ടില് എത്തിച്ചു. രക്ഷിതാക്കളാണ് കുട്ടിയെ ആശുപത്രിയില് പ്രവേശിപ്പിച്ചത്. പനി ബാധിച്ച് ഏതാനും ദിവസങ്ങളായി കുട്ടിക്ക് ക്ലാസില് പോകാന് കഴിഞ്ഞിരുന്നില്ല. ഇതിനുശേഷം വെള്ളിയാഴ്ച ക്ലാസില് എത്തിയപ്പോഴാണ് കുട്ടിക്ക് അടിയേറ്റത്. സംഭവത്തില് ബാലാവകാശ കമ്മീഷനും കുട്ടിയുടെയും രക്ഷിതാക്കളുടെയും മൊഴി രേഖപ്പെടുത്തിയിട്ടുണ്ട്.
