കുടക്: കര്ണാടകയിലെ കുടകില് ട്രക്കിങിന് എത്തിയ മലയാളി യുവതിയെ കാണ്മാനില്ല. എറണാകുളത്ത് സോഫ്റ്റ് വെയര് എഞ്ചിനീയറായി ജോലി ചെയ്യുന്ന നാദാപുരം പേരോട് 
സ്വദേശി ജി.എസ്.ശരണ്യയെയാണ് (31) കാണാതായത്.
രണ്ടാം തിയ്യതി വ്യാഴാഴ്ചയാണ് ശരണ്യ കുടകില് എത്തിയത്. കര്ണാടകയിലെ ഏറ്റവും വലിയ രണ്ടാമത്തെ മലയിലാണ് ട്രക്കിങിനായി കയറിയത്. ചോല വനവും പുല്മേടുകളും നിറഞ്ഞ 14 കിലോമീറ്റര് ദൂരത്തിലാണ് മലയില് ട്രക്കിങിന് അനുമതിയുള്ളത്. ട്രക്കിങിന് മലകയറിയ ശരണ്യയ്ക്ക് വഴിതെറ്റുകയായിരുന്നു. യുവതിയെ കാണ്മാനില്ലെന്ന പരാതിയെതുടര്ന്ന് കര്ണാടക വനംവകുപ്പും പോലീസും മലയില് തെരച്ചില് തുടരുകയാണ്.
എറണാകുളത്ത് നിന്ന് ശരണ്യ ഒറ്റയ്ക്കാണ് ട്രക്കിങിനായി
കുടകിലെത്തിയത്. കുടകിലെ റിസോര്ട്ടിലെത്തിയശേഷം മറ്റു സഞ്ചാരികള്ക്കൊപ്പമാണ് ട്രക്കിങിന് മല കയറിയത്. ട്രക്കിങ് സംഘത്തില് ഏറ്റവും പിന്നിലായാണ് ശരണ്യ ഉണ്ടായിരുന്നത്. ഇതിനിടയില് ശരണ്യക്ക് വഴി തെറ്റുകയായിരുന്നു. വൈകുന്നേരം നാല് മണിയോടെ സംഘം തിരിച്ചെത്തിയെങ്കിലും ശരണ്യ ഉണ്ടായിരുന്നില്ല. തനിക്ക് വഴിതെറ്റിയതായി ശരണ്യ ഹോംസ്റ്റേ ജീവനക്കാരെ ഫോണിലൂടെ അറിയിച്ചിരുന്നു. പിന്നീട് ഫോണ് സിഗ്നല് നഷ്ടമായി. പോലീസ്, വനംവകുപ്പ് എന്നിവയുടെ നാലു പ്രത്യേക 
സംഘങ്ങള് ഡ്രോണ് ക്യാമറകള് ഉപയോഗിച്ച് പരിശോധന നടത്തുന്നുണ്ട്. മൊബൈല് സിം കാര്ഡ് ലൊക്കേഷന് ട്രാക്ക് ചെയ്തും അന്വേഷണം നടക്കുകയാണ്.
കൂടുതല് ഉദ്യോഗസ്ഥരെ വിന്യസിക്കാനും സാങ്കേതിക വിദ്യ ഉപയോഗിച്ച് തെരച്ചില് വ്യാപിപ്പിക്കാനും അധികാരികള് നിര്ദ്ദേശം നല്കി. ഡ്രോണുകളും സ്നിഫര് നായകളെയും ഉപയോഗിച്ച് വനത്തിന് അകത്തും മറ്റ് വഴികളിലും പരിശോധന നടക്കുന്നുണ്ട്. കനത്ത കാടും പ്രതികൂല കാലാവസ്ഥയും തെരച്ചിലിന് വെല്ലുവിളിയാകുന്നുണ്ട്.
