വടകര: വില്യാപ്പള്ളി ഗ്രാമപഞ്ചായത്ത് നാലാം വാര്ഡില് തിരുമനയില് ഗ്രാമ പഞ്ചായത്ത് ഓഫീസിന് പുതുതായി കെട്ടിടം പണിയുന്ന സ്ഥലത്തിന്റെ അതിര്ത്തി വരെയുള്ള 
റോഡുകള് പരസ്പരം ബന്ധിപ്പിച്ച് ഗതാഗത യോഗ്യമാക്കണമെന്ന ആവശ്യവുമായി നാട്ടുകാര് രംഗത്ത്. ഇതിനുവേണ്ടി പ്രദേശവാസികള് പഞ്ചായത്ത് പ്രസിഡന്റ്, കുറ്റ്യാടി എംഎല്എ, തദ്ദേശ സ്വയംഭരണ മന്ത്രി എന്നിവര്ക്ക് നിവേദനം നല്കി.
തിരുമന എല്പി സ്കൂള് പരിസരം വരെ എത്തി നില്ക്കുന്ന തിരുമന ക്ഷേത്രം-തിരുമന സ്കൂള് റോഡ് തൊട്ട് കിഴക്കു ഭാഗത്തുകൂടി കടന്നു പോകുന്ന വില്യാപ്പള്ളി ടൗണ്-മേമുണ്ട ചെമ്മരത്തൂര് റോഡുമായി ബന്ധിപ്പിക്കണമെന്നാണ് നാട്ടുകാരുടെ ആവശ്യം. പഞ്ചായത്ത് ഫണ്ടിന്റെ കുറവ് പരിഹ രിക്കാന് നാട്ടുകാരില് നിന്നു ഫണ്ട് ശേഖരിച്ചാണ് സ്കൂളിനോട് 
തൊട്ടടുത്ത പുതുക്കുളങ്ങര പൊതു കുളത്തോട് ചേര്ന്ന സ്ഥലം കെട്ടിടം പണിയുന്നതിനായി പഞ്ചായത്ത് വാങ്ങിയത്. നിലവില് ഈ സ്ഥലത്തിന്റെ മുന്വശത്തും പിന്വശത്തും റോഡ് നിര്മിച്ചിട്ടുണ്ട്. ഈ റോഡുകള് പരസ്പരം ബന്ധിപ്പിച്ചുകൊണ്ട് തിരുമന ക്ഷേത്രം-വരിക്കോളി ലക്ഷംവീട് റോഡ്, മുണ്ടോളിത്താഴ-അമരാവതി റോഡ്, തിരുമന സ്കൂള്, തിരുമന ക്ഷേത്രം, തിരുമന മഠം എന്നിവിടങ്ങളിലേക്കുള്ള യാത്രാ സൗകര്യം വര്ധിപ്പിക്കണമെന്ന് നിവേദനത്തില് ആവശ്യപ്പെട്ടു.
-ടി.പി.ബാലകൃഷ്ണന്
