വടകര: പഴയ സ്റ്റാന്റില് നിന്നു സര്വീസ് നടത്തുന്ന ബസുകള് വീണ്ടും ലിങ്ക് റോഡിലേക്ക് മാറ്റിയ എംഎല്എയുടെയും കലക്ടറുടെയും നടപടി നഗരസഭാ തീരുമാനത്തിന് വിരുദ്ധമെന്ന് 
ചെയര് പേഴ്സണ് പി.കെ. ശശി വാര്ത്താ കുറിപ്പില് അറിയിച്ചു.
ഗതാഗത കുരുക്കിന് പരിഹാരം കാണാന് നഗരസഭാ ചെയര്പേഴ്സന്റെ അധ്യക്ഷതയില് ഏപ്രില് 24, മെയ് 2, മെയ് 15 തിയതികളില് ട്രാഫിക് റഗുലേറ്ററി കമ്മിറ്റി യോഗം ചേര്ന്നതിന്റെ അടിസ്ഥാനത്തില് വടകര പട്ടണത്തിലെ കച്ചവടക്കാര്, ബസ് തൊഴിലാളികള്, ബസ് ഉടമകള്, എന്നിവരുടെ യോഗം വിളിച്ചു ചേര്ക്കുകയുണ്ടായി. ഓരോ വിഭാഗത്തിന്റെയും ആവശ്യങ്ങളും നിര്ദ്ദേശങ്ങളും പരാതികളും ചര്ച്ചചെയ്യുകയും ഒരു പരിധിവരെ പരാതികള് പരിഹരിക്കുകയും ചെയ്തതിനുശേഷമാണ് ലിങ്ക് റോഡില് നിന്നു കൊയിലാണ്ടി, പേരാമ്പ്ര, കൊളാവിപ്പാലം എന്നിവിടങ്ങളിലേക്ക് സര്വീസ് നടത്തിയിരുന്ന 
ബസുകള് പഴയ സ്റ്റാന്റിലേക്ക് മാറ്റാന് തീരുമാനിച്ചതെന്ന് ചെയര്പേഴ്സണ് വ്യക്തമാക്കി.
വിഷയം ചര്ച്ച ചെയ്യുന്ന സമയത്ത് ബസ് ഉടമകളും തൊഴിലാളികളും ഉന്നയിച്ച പ്രധാന വിഷയം മാര്ക്കറ്റ് റോഡിലെ അനധികൃത പാര്ക്കിങ്ങ്, പുതിയ സ്റ്റാന്റിലേക്കുള്ള പ്രവേശന തടസ്സം, സര്വീസ് റോഡിന്റെ ശോചനീയാവസ്ഥ എന്നിവയായിരുന്നു. മാര്ക്കറ്റ് റോഡിലെ ഗതാഗതപ്രശ്നം പരിഹരിക്കുന്നതിന് വ്യാപാരി സംഘടനകളുടെ യോഗം വിളിച്ചുചേര്ത്തു. ഇവിടെ ലോറിയില് നിന്നു സാധനം ഇറക്കുന്ന സമയത്തുണ്ടാകുന്ന ഗതാഗതപ്രശ്നം പരിഹരിക്കുന്നതിന് രാവിലെ 11ന് ശേഷവും പകല് മൂന്നിന് മുമ്പായും സാധനങ്ങള് ഇറക്കി സഹകരിക്കാമെന്ന് വ്യാപാരി സംഘടനകള് യോഗത്തില് ഉറപ്പുനല്കുകയുണ്ടായി. പിഴ ചുമത്തിയതിലൂടെ മാര്ക്കറ്റ് റോഡിലെ അനധികൃത പാര്ക്കിംഗിന് ഒരു പരിധിവരെ 
പരിഹാരം കണ്ടെത്തിയിരുന്നു. നഗരത്തിലെ ഗതാഗതകുരുക്ക് ഒഴിവാക്കുന്നതിന് ലിങ്ക് റോഡിലെ പാര്ക്കിങ്ങ് ഒഴിവാക്കി റോഡ് ടൂവേ ആക്കുന്നതിനും അടക്കാതെരു കെഎസ്എസ് മുതല് അഞ്ചുവിളക്ക് ജങ്ങ്ഷന് വരെ റോഡിന്റെ ഇരുവശത്തും വാഹന പാര്ക്കിംഗ് നിരോധിക്കാനും തീരുമാനിച്ചു. റെസ്റ്റ് ഹൗസ്-റെയില്വേ സ്റ്റേഷന് റോഡ് പിഡബ്ല്യുഡിയുടെ സര്ട്ടിഫിക്കറ്റ് കിട്ടുന്ന മുറയ്ക്ക് ആരംഭിക്കാനും പുതിയ നഗരസഭ ഓഫീസ് പരിസരത്ത് അനധികൃതമായി കാറുകള് പാര്ക്ക് ചെയ്യുന്നത് ഒഴിവാക്കാനും നിശ്ചയിച്ചു. റെയില്വേ സ്റ്റേഷനിലേക്ക് പോകുന്ന റോഡ് വണ്വേ ആക്കാനും റെയില്വേ സ്റ്റേഷനില് നിന്നു വരുന്ന വാഹനങ്ങള് കീര്ത്തി മുദ്ര ടാക്കീസ് വഴി കരിമ്പന പാലം വഴി തിരിച്ചു വിടുന്നതിനും മള്ട്ടി പാര്ക്കിങ്ങ് സംവിധാനം നടപ്പിലാക്കുന്നതിനെപ്പറ്റി ആലോചിക്കുവാനും ദേശീയ പാത അതോറിറ്റിയുമായി ബന്ധപ്പെട്ട് ദേശീയപാതക്ക് അടിഭാഗമുള്ള സ്ഥലം പാര്ക്കിങ്ങിന് ലഭ്യമാവുമോ എന്ന് പരിശോധിക്കുന്നതിനും തീരുമാനിച്ചു. സര്വീസ് റോഡിന്റെ 
ശോചനീയാവസ്ഥ പരിഹരിക്കുന്നതിന് കരാര് കമ്പനിയായ വഗാഡ്, അദാനി എന്റര്പ്രൈസസ് എന്നീ കമ്പനിയിലെ ഉദ്യോഗസ്ഥരുടെ മീറ്റിങ്ങ് വിളിച്ചു ചേര്ത്ത് കോട്ടക്കടവ് മുതല് അടക്കാതെരു വരെ ഇരുവശങ്ങളിലുമുള്ള സര്വീസ് റോഡ് റീ ടാറിങ് നടത്താനും സര്വീസ് റോഡ് ഗതാഗത യോഗ്യമാക്കാനും തീരുമാനിച്ചു. കോട്ടക്കടവ് റെയില്വേ ഗേറ്റിന് സമീപത്തെ മെയിന് റോഡ് ഗതാഗത്തിനു തുറന്നുകൊടുക്കുന്നതിനും കൂടാതെ പുതിയ ബസ് സ്റ്റാന്ഡിനകത്തുകൂടെ ഉണ്ടായിരുന്ന സര്വീസ് റോഡ് നിര്ത്തലാക്കുകയും ഹൈവേയുടെ സ്ഥലത്തെ സര്വീസ് റോഡ് ഗതാഗത യോഗ്യമാക്കുകയും ചെയ്തിരുന്നു. ഇത്രയും നടപടിക്രമങ്ങള് പൂര്ത്തിയാക്കിയ ശേഷമാണ് ലിങ്ക് റോഡില് നിന്നു ബസ് സര്വീസ് പഴയ ബസ് സ്റ്റാന്ഡിലേക്ക് മാറ്റാന് തീരുമാനിച്ചതെന്നും വാര്ത്താ കുറിപ്പില് പറഞ്ഞു.
