ന്യൂഡല്ഹി: രാജ്യത്ത് സബ്സിഡിയുള്ള പാചകവാതക സിലിണ്ടറുകളുടെ എണ്ണം നാലായി 
കുറച്ചു. പ്രതിവര്ഷം 9 സിലിണ്ടറുകളായിരുന്നു നേരത്തെ അനുവദിച്ചിരുന്നത്. പ്രധാനമന്ത്രി ഉജ്വല് യോജന ഗുണഭോക്താക്കള്ക്ക് അനുവദിച്ചിരുന്ന സിലിണ്ടറുകളുടെ എണ്ണമാണ് കുറച്ചിരിക്കുന്നത്. ഗാര്ഹിക സിലിണ്ടറിന്റെ വില കൂട്ടിയതിന് ശേഷമാണ് സാധാരണ ജനങ്ങള്ക്കുള്ള മറ്റൊരു ഇരുട്ടടി. പശ്ചിമേഷ്യന് സംഘര്ഷത്തിന്റെ പശ്ചാത്തലത്തിലാണ് 
ഈ തീരുമാനവും.
2016ല് ഉജ്വല യോജന പ്രഖ്യാപിച്ചതിന് ശേഷം പ്രതിവര്ഷം ഒരു ഗുണഭോക്താവിന് 12 സിലിണ്ടറുകളാണ് ലഭിച്ചിരുന്നത്. പിന്നീട് ഇത് 9 ആക്കി. ഇതിന് പിന്നാലെയാണ് വീണ്ടും വെട്ടിച്ചുരുക്കി നാലാക്കിയിരിക്കുന്നത്. പൊതുമേഖലാ എണ്ണക്കമ്പനികള്ക്ക് ഇപ്പോഴും വന് നഷ്ടം സംഭവിക്കുന്നുണ്ടെന്ന് ചൂണ്ടിക്കാട്ടിയാണ് പെട്രോളിയം മന്ത്രാലയം ഈ തീരുമാനം പ്രഖ്യാപിച്ചിരിക്കുന്നത്.
ഗാര്ഹിക സിലിണ്ടറിന് 29 രൂപയാണ് ഞായറാഴ്ച വര്ധിപ്പിച്ചത്. മൂന്നു മാസത്തിനിടെ ഇത് 
രണ്ടാം തവണയാണ് ഗാര്ഹിക സിലിണ്ടറിന് വില കൂട്ടുന്നത്. പശ്ചിമേഷ്യന് സംഘര്ഷം അയവില്ലാതെ തുടരുന്ന പശ്ചാത്തലത്തിലാണ് ഈ വിലവര്ധന. ഇത്രയൊക്കെ വില വര്ധിപ്പിച്ചിട്ടും തങ്ങള്ക്ക് മുന്നോട്ടുപോകാന് വല്ലാത്ത പ്രയാസമാണെന്നാണ് എണ്ണക്കമ്പനികള് പറയുന്നത്. വാണിജ്യ സിലിണ്ടര് വില കുത്തനെ കൂടിയതോടെ ഹോട്ടല് ഭക്ഷണത്തിന്റെ വിലയും കുതിച്ചുയരുകയാണ്.
