ന്യൂഡല്ഹി: രാജ്യത്ത് പാചക വാതക വില കൂട്ടി. പശ്ചിമേഷ്യന് സംഘര്ഷത്തിന്റെ പശ്ചാത്തലത്തിലാണ് ഗാര്ഹിക എല്പിജി സിലിണ്ടറുകളുടെ വില ഉള്പ്പെടെ 
വര്ധിപ്പിച്ചത്. 14.2 കിലോഗ്രാം ഗാര്ഹിക എല്പിജി സിലിണ്ടറുകളുടെ വില 60 രൂപ കൂട്ടി. വാണിജ്യ ആവശ്യത്തിനുള്ള എല്പിജി സിലിണ്ടറിന്റെ വില 115 രൂപയും വര്ധിപ്പിച്ചു. ഇതോടെ കൊച്ചിയില് ഗാര്ഹിക സിലിണ്ടറിന്റെ വില 920 രൂപയായി. നേരത്തേ വില 863 രൂപയായിരുന്നു. വില വർധന ഇന്ന് മുതല് പ്രാബല്യത്തില് വരും.
ഡല്ഹിയില് വില 853 രൂപയില് നിന്ന് 913 രൂപയായി ഉയര്ന്നു. മുംബെയില്, ഗാര്ഹിക എല്പിജി സിലിണ്ടറിന്റെ പുതിയ നിരക്ക് ഇപ്പോള് 912.50 രൂപയിലാണ്, നേരത്തെ ഇത് 852.50 
രൂപയായിരുന്നു. കൊല്ക്കത്തയില് വില 879 രൂപയില് നിന്ന് 930 രൂപയായും ചെന്നൈയില് 868.50 രൂപയില് നിന്ന് 928.50 രൂപയായും ഉയര്ന്നു. 19 കിലോഗ്രാം വരുന്ന വാണിജ്യ സിലിണ്ടറുകളുടെ പുതുക്കിയ വില കേരളത്തിൽ ഇന്നുമുതൽ 1890 രൂപയായി ഉയരും.
അമേരിക്കയും ഇസ്രായേലും ചേർന്ന് ഇറാനുനേരെ നടത്തിയ ആക്രമണം വിലവർധനക്ക് വഴിയൊരുക്കിയെന്നാണ് വിലയിരുത്തൽ. രാജ്യാന്തര വിപണിയിൽ ക്രൂഡ് ഓയിൽ വിലയിൽ വെള്ളിയാഴ്ച വൻ വർധനവാണുണ്ടായത്. യു.എസ്-ഇറാൻ യുദ്ധം അനിശ്ചിതമായി നീളുമെന്ന ആശങ്കയുടെ പശ്ചാത്തലത്തിലാണിത്.
