വടകര: കരിമ്പനപ്പാലം മുതല് മൂരാട് വരെ ദേശീയപാതയോരത്ത് തട്ടുകട നടത്തുന്നവരെ കുടിയൊഴിപ്പിക്കാനുള്ള നീക്കത്തിനെതിരെ പ്രതിഷേധവുമായി ഐഎന്ടിയുസി. 
ഒഴിഞ്ഞുപോകണമെന്ന
നഗരസഭ അധികൃതരുടെയും ദേശീയപാത അധികൃതരുടെയും നിലപാട് പുനഃപരിശോധിക്കണമെന്ന് തട്ടുകട ഫുട്പാത്ത് ജനറല് വര്ക്കേഴ്സ് യൂണിയന് (ഐഎന്ടിയുസി) ഭാരവാഹികള് വാര്ത്താസമ്മേളനത്തില് ആവശ്യപ്പെട്ടു. ഏകപക്ഷീയ നടപടിക്കെതിരെ മുനിസിപ്പല് ഓഫീസിലേക്ക് മാര്ച്ച് സംഘടിപ്പിക്കുമെന്ന് ഇവര് അറിയിച്ചു.
വഴിയോര കച്ചവടക്കാരുടെ വിഷയങ്ങള് ചര്ച്ച ചെയ്യുന്നതിന് സര്ക്കാര് നിര്ദ്ദേശ പ്രകാരം 
തൊഴിലാളി -മുതലാളി, ഹെല്ത്ത് വിഭാഗം, എസ്ഐ, നഗരസഭ അധികൃതര് എന്നിവര് അടങ്ങുന്ന കമ്മിറ്റി നിലവിലുണ്ട്. ഈ കമ്മറ്റി വിളിച്ചു കൂട്ടി ചര്ച്ച ചെയ്യാതെ അധികൃതര് ഏകപക്ഷിയ തീരുമാനങ്ങള് നടപ്പിലാക്കുന്നത് അംഗീകരിക്കാനാവില്ല. ഈ മേഖലയിലെ തൊഴിലാളികളുടെ സംരക്ഷണത്തിന് കേന്ദ്ര സര്ക്കാര് നടപ്പിലാക്കിയ പദ്ധതിയുടെ ഭാഗമായി ബാങ്ക് ലോണ് എടുത്ത് കച്ചവടം ചെയ്യുന്നവരെ കുടി ഒഴിപ്പിച്ചാല് തൊഴിലാളികളും കുടുംബവും വഴിയാധാരമാകുമെന്ന് ഐഎന്ടിയുസി ചൂണ്ടിക്കാട്ടി. തൊട്ടടുത്ത് 
എല്ഡിഎഫ് ഭരണത്തിലുള്ള തലശ്ശേരിയിലും കൊയിലാണ്ടിയിലും നഗരസഭ അധികൃതര് വഴിയോര കച്ചവടക്കാരെ ചേര്ത്ത് പിടിച്ചും രാഷ്ട്രീയനിറം നോക്കാതെ സംരക്ഷണം നല്കുകയും ചെയ്യുമ്പോള് വടകര നഗരസഭ അധികൃതര് വഴിയോര കച്ചവടക്കാരെ ദ്രോഹിക്കുകയാണെന്ന് ഇവര് കുറ്റപ്പെടുത്തി.
വാര്ത്താസമ്മേളനത്തില് സംഘടനയുടെ ജില്ലാ കെ.എന്.എ.അമീര്, പി.ദസ്തകീര്, നാരായണനഗരം പത്മനാഭന്, സലിം കോട്ടക്കല്, രാജേഷ് കിണറ്റിന്കര, പി.ടി.മജീദ്, പി.ടി.റഫീക്ക് തുടങ്ങിയവര് പങ്കെടുത്തു.
