ന്യൂഡല്ഹി: രാജ്യത്ത് ഗാര്ഹിക പാചകവാതകത്തിന്റെ വിലകുറച്ചു. സിലിണ്ടറൊന്നിന് നൂറുരൂപയാണ് കുറച്ചതെന്ന് പ്രധാനമന്ത്രി നരേന്ദ്രമോദി എക്സിലൂടെ അറിയിച്ചു. ദശലക്ഷക്കണക്കിന് കുടുംബങ്ങളുടെ ക്ഷേമം ലക്ഷ്യമിട്ടാണ് പ്രഖ്യാപനമെന്നും അദ്ദേഹം പറഞ്ഞു. വനിതാദിനം പ്രമാണിച്ചാണ് പ്രഖ്യാപനം.
പാചക വാതകം താങ്ങാനാവുന്ന വിലയില് ലഭ്യമാക്കുക വഴി കുടുംബങ്ങളുടെ ക്ഷേമവും ആരോഗ്യകരമായ പരിസ്ഥിതിയും ഉറപ്പാക്കാനാണ് ലക്ഷ്യമിടുന്നതെന്നാണ് മോദി പറഞ്ഞത്. സ്ത്രീകളുടെ ജീവിതം കൂടുതല് ആയാസരഹിതമാക്കാനുളള ലക്ഷ്യത്തിന്റെ ഭാഗമാണിതെന്നും പ്രധാനമന്ത്രി കൂട്ടിച്ചേര്ത്തു.
പാവപ്പെട്ടവര്ക്കായുള്ള ഉജ്വല യോജന വഴി വിതരണം ചെയ്യുന്ന ഗ്യാസ് സിലിണ്ടറുകളുടെ സബ്സിഡി ഒരുവര്ഷത്തേക്ക് നീട്ടാന് കേന്ദ്രമന്ത്രിസഭ കഴിഞ്ഞദിവസം തീരുമാനമെടുത്തിരുന്നു. ദാരിദ്ര്യ രേഖക്ക് താഴെയുള്ള സ്ത്രീകള്ക്ക് ഗ്യാസ് സിലിണ്ടര് നല്കുന്ന പദ്ധതിയാണ് ഉജ്വല യോജന. 14.2 കിലോയുടെ സിലിണ്ടറിന്റെ മൂന്നൂറുരൂപ സബ്സിഡിയാണ് അടുത്തവര്ഷം മാര്ച്ചുവരെ നീട്ടാന് തീരുമാനിച്ചത്.