പുരസ്‌കാര നിറവില്‍ കൊയിലാണ്ടി അഗ്‌നിരക്ഷാ നിലയം

കൊയിലാണ്ടി: സ്തുത്യര്‍ഹ സേവനത്തിനു രാഷ്ട്രപതിയുടെ ഫയര്‍ സര്‍വീസ് മെഡലിനു കൊയിലാണ്ടി അഗ്‌നിരക്ഷാനിലയം ഗ്രേഡ്:അസിസ്റ്റന്റ് സ്റ്റേഷന്‍ ഓഫീസര്‍ പെരുവട്ടൂര്‍ പിടിക കണ്ടി പി.കെ.ബാബു അര്‍ഹനായി .  ഈവര്‍ഷം ഏപ്രിലില്‍ വിരമിക്കാനിരിക്കെയാണ് രാഷ്ട്രപതിയുടെ അംഗീകാരം തേടിയെത്തിയത്. 1999 ലാണ് ഇദ്ദേഹം സര്‍വീസില്‍ പ്രവേശിച്ചത്. വെളിമാടുകുന്ന്, പേരാമ്പ്ര, മുക്കം, കൊയിലാണ്ടി എന്നീ അഗ്‌നിരക്ഷാ നിലയങ്ങളില്‍ സേവനമനുഷ്ഠിച്ചു.

 

നിരവധിയായ രക്ഷാപ്രവര്‍ത്തനങ്ങളില്‍ പങ്കാളിയായ പി.കെ.ബാബു കടലുണ്ടി തീവണ്ടി ദുരന്തം, മിഠായിത്തെരുവിലെ വിവിധ കാലങ്ങളില്‍ നടന്ന തീപിടുത്തങ്ങള്‍, 2018-19 കാലത്തെ വെള്ളപ്പൊക്ക സമയത്തെ രക്ഷാപ്രവര്‍ത്തനങ്ങള്‍, കോഴിക്കോട് ഐസ് പ്ലാന്റില്‍ അമോണിയം ലീക്കായതിനെ തുടര്‍ന്നുണ്ടായ അത്യന്തം അപകടകരമായ രക്ഷാപ്രവര്‍ത്തനം, 2024 മഴക്കാലത്ത് ബാലുശ്ശേരി മഞ്ഞപ്പാലം പുഴക്ക് കുറുകെ വടം കെട്ടി തൂങ്ങി മറുകര എത്തി കുടുംബത്തെ രക്ഷിച്ച പ്രവര്‍ത്തനം, കിണര്‍ അപകടങ്ങളില്‍ നിന്നുള്ള രക്ഷാപ്രവര്‍ത്തനം എന്നിങ്ങനെ നൂറുകണക്കിന് രക്ഷാപ്രവര്‍ത്തനങ്ങളില്‍ ഇദ്ദേഹം വിവിധ കാലങ്ങളില്‍ പങ്കാളിയായി. 2021ല്‍ മുഖ്യമന്ത്രിയുടെ ഫയര്‍ സര്‍വീസ് മെഡലിനും പി.കെ.ബാബു അര്‍ഹനായി. ഭാര്യ :ബിന്ദു. മക്കള്‍: യദുകൃഷ്ണ, മാളവിക

-സുധീര്‍ കൊരയങ്ങാട്