പാലക്കാട്: കോയമ്പത്തൂര് മധുക്കര ദേശീയപാതയില് കാറുകള് കൂട്ടിയിടിച്ചുണ്ടായ അപകടത്തില് രണ്ട് മലയാളികളുള്പ്പെടെ മൂന്നുപേര്ക്ക് ദാരുണാന്ത്യം. പാലക്കാട് ചിറ്റൂര് 
ചന്ദനപ്പുറം സ്വദേശി അജിത്ത് (25), പിരായിരി സ്വദേശി വിനീഷ് (35) എന്നിവരാണ് മരിച്ചത്. അപകടത്തില് നാല് പേര്ക്ക് പരിക്കേറ്റു. അപകടത്തില് പരിക്കേറ്റ ചിറ്റൂര് സ്വദേശി അഭിലാഷ് (20), കാടാങ്കോട് സ്വദേശി സുനില് (40) എന്നിവരെ പാലക്കാട് ജില്ലാ ആശുപത്രിയില് പ്രവേശിപ്പിച്ചു. അഭിലാഷിന്റെ പരിക്ക് ഗുരുതരമായതിനാല് തൃശൂര് മെഡിക്കല് കോളജ് ആശുപത്രിയിലേക്ക് മാറ്റി.
കോയമ്പത്തൂരില് വിവാഹച്ചടങ്ങിന്റെ ഫോട്ടോഗ്രഫി 
കഴിഞ്ഞ് മടങ്ങുമ്പോഴായിരുന്നു അപകടം. സര്വീസ് റോഡിലൂടെ ഇവര് സഞ്ചരിച്ച സ്വിഫ്റ്റ് ഡിസയര് കാറില് എതിര്ദിശയില്നിന്ന് അമിതവേഗത്തിലെത്തിയ ഇന്നോവ കാര് ഡിവൈഡര് തകര്ത്തുവന്ന് ഇടിച്ചുകയറുകയായിരുന്നു. ഇന്നോവ കാറില് സഞ്ചരിച്ച തമിഴ്നാട് സ്വദേശിയായ അദിത്ത് (29) എന്നയാളും മരിച്ചിട്ടുണ്ട്. സംഭവത്തില് കെജി ചാവടി പൊലീസ് അന്വേഷണം ആരംഭിച്ചു.
