പാലക്കാട്: പി.വി.അന്‍വര്‍ യുഡിഎഫിന് മുന്നില്‍ വെച്ച ഉപാധികളെല്ലാം തള്ളി പ്രതിപക്ഷ നേതാവ് വി.ഡി.സതീശനും 
കെപിസിസി പ്രസിഡന്റ് കെ.സുധാകരനും. പി.വി.അന്‍വര്‍ യുഡിഎഫിനെ വെല്ലുവിളിക്കേണ്ട. സ്ഥാനാര്‍ഥിയെ പിന്‍വലിക്കുന്നതുമായി ബന്ധപ്പെട്ട ഒരു ഉപാധികളും അംഗീകരിക്കില്ലെന്നും സൗകര്യമുണ്ടെങ്കില്‍ മാത്രം പിന്തുണച്ചാല്‍ മതിയെന്നും വിഡി സതീശന്‍ പറഞ്ഞു.
എല്‍ഡിഎഫില്‍ നിന്ന് പുറത്തേക്ക് വരുമ്പോള്‍ അന്‍വര്‍ നിരത്തിയ കാരണങ്ങള്‍ ഉയര്‍ത്തിപ്പിടിക്കുകയാണെങ്കില്‍ അദ്ദേഹം യുഡിഎഫുമായി സഹകരിക്കുകയാണ് വേണ്ടത്. യുഡിഎഫിന് മുന്നില്‍ ഉപാധികള്‍ വെച്ചുള്ള തമാശകളൊന്നും വേണ്ട, ചേലക്കരയില്‍ രമ്യയെ പിന്‍വലിക്കാനാണല്ലോ ഞങ്ങള്‍ ഈ പണിയൊക്കെ എടുക്കുന്നതെന്നും അന്‍വറിന്റെ ഈ ആവശ്യം ഒരു 
തമാശയായി മാത്രം കണ്ടാല്‍ മതിയെന്നും പ്രതിപക്ഷ നേതാവ് പരിഹാസ രൂപത്തില്‍ പറഞ്ഞു. സഹകരിക്കാന്‍ അന്‍വറിന് താല്‍പ്പര്യം ഉണ്ടെന്ന് അറിയിച്ചപ്പോള്‍ ഒരു ചര്‍ച്ചയ്ക്ക് തയ്യാറായിരുന്നു. നിങ്ങള്‍ റിക്വസ്റ്റ് ചെയ്താല്‍ എന്റെ സ്ഥാനാര്‍ഥികളെ പിന്‍വലിക്കാമെന്നാണ് അന്‍വര്‍ പറഞ്ഞത്. റിക്വസ്റ്റ് ചെയ്തപ്പോള്‍ രമ്യയെ പിന്‍വലിക്കണമെന്നും എങ്കില്‍ തന്റെ പാലക്കാട്ടെ സ്ഥാനാര്‍ഥിയെ പിന്‍വലിക്കാമെന്ന നിര്‍ദേശവുമാണ് അദ്ദേഹം മുന്നോട്ടുവച്ചത്. കഴിയുമെങ്കില്‍ അന്‍വറിന് യുഡിഎഫിനെ പിന്തുണയ്ക്കാം. മറ്റൊരു ഉപാധികളും കോണ്‍ഗ്രസും യുഡിഎഫും സ്വീകരിക്കുന്നില്ല. കഴിഞ്ഞ രണ്ടുവര്‍ഷമായി ഞങ്ങള്‍ ഉന്നയിക്കുന്ന ആരോപണമാണ് അന്‍വറും സര്‍ക്കാരിനെതിരെ ഉയര്‍ത്തിയിരിക്കുന്നത്. സിപിഎം-ബിജെപി അവിഹിത ബന്ധവും ദുര്‍ഭരണവുമായിരുന്നു ഇവ. ഇങ്ങനെ സര്‍ക്കാരിനെതിരെ ആരോപണം ഉന്നയിക്കുന്ന ആളുകള്‍ എന്തിനാണ് അവരെ 
സഹായിക്കാന്‍ സ്ഥാനാര്‍ഥികളെ നിര്‍ത്തുന്നതെന്നും സതീശന്‍ ചോദിച്ചു. സ്ഥാനാര്‍ഥിയെ പിന്‍വലിച്ചാല്‍ നല്ലകാര്യം, ഇല്ലെങ്കില്‍ അങ്ങനെ പോയ്ക്കോട്ടെ. ആര്‍ക്ക് മുന്നിലും യുഡിഎഫ് വാതില്‍ അടച്ചിട്ടുമില്ല തുറന്നിട്ടുമില്ല. ഉചിതമായ തീരുമാനങ്ങള്‍ അതാത് സമയത്തെടുക്കും. അത് രാഷ്ട്രീയമാണ്. വയനാട്ടില്‍ പ്രിയങ്ക ഗാന്ധിയെ നിരുപാധികം പിന്തുണയ്ക്കുമെന്നാണ് പിവി അന്‍വര്‍ അറിയിച്ചിരിക്കുന്നത്. അതില്‍ സന്തോഷമുണ്ട്. ഇനി അന്‍വര്‍ പിന്തുണച്ചില്ലെങ്കില്‍ പ്രിയങ്ക ഗാന്ധി വയനാട്ടില്‍ കഷ്ടപ്പെട്ടുപോകുമല്ലോയെന്നും വിഡി സതീശന്‍ പരിഹസിച്ചു.
