കൊയിലാണ്ടി: നവരാത്രി ആഘോഷത്തിന്റെ ഭാഗമായി പൊയില്‍ക്കാവ് ശ്രീ ദുര്‍ഗാ-ദേവീക്ഷേത്രത്തില്‍ മുതിര്‍ന്ന പൗരന്മാരുടെ 
ശാസ്ത്രീയ സംഗീത അരങ്ങേറ്റം വേറിട്ടൊരു മേളവിരുന്നായി. കൗമാരക്കാരുടെ ഉത്സാഹത്തോടെ വേദിയിലെത്തിയ സപ്തതി കഴിഞ്ഞവരുടെയും അതിനോടടുത്തവരുടെയും അരങ്ങേറ്റം കാണാന്‍ ഏറെ പേരെത്തി.
പാലക്കാട് പ്രേംരാജിന്റെ ശിക്ഷണത്തില്‍ മൂന്നു വര്‍ഷമായി ശാസ്ത്രീയ സംഗീത പഠനം അഭ്യസിച്ചവരാണ് അരങ്ങേറ്റം നടത്തിയത്. കേരള സീനിയര്‍ സിറ്റിസണ്‍സ് ഫോറം ചെങ്ങോട്ടുകാവിന്റെ സംഗീത സായന്തനം ഗ്രൂപ്പിലെ 30 അംഗങ്ങളാണ് ഇവര്‍.
പതിനഞ്ച് പേരടങ്ങുന്ന രണ്ടു സംഘങ്ങളായി ക്ഷേത്രത്തിലെ സരസ്വതീ മണ്ഡപത്തില്‍ പത്തിലധികം കീര്‍ത്തനങ്ങള്‍ ആലപിച്ച് കൊണ്ട് ഇവര്‍ സദസ്യരെ ആനന്ദ ഭരിതരാക്കി.
നേരത്തെ കേരള സീനിയര്‍ സിറ്റിസണ്‍സ് ഫോറം സംഘടനയുടെ ജില്ലാ, സംസ്ഥാന സമ്മേളനങ്ങളിലും മലരി കലാമന്ദിരത്തിന്റെ നവരാത്രി സംഗീതോത്സവത്തിലും ഇവര്‍ സംഗീത സപര്യ നടത്തിയിട്ടുണ്ട്. ഇവര്‍ക്ക് പക്കമേളക്കാരായി വയലിനില്‍ പുഷ്പ 
പ്രേംരാജും മൃദംഗത്തില്‍ പന്തലായനി രാമകൃഷ്ണനും തബലയില്‍ ബാലകൃഷ്ണന്‍ കരുവണ്ണൂരും കീബോര്‍ഡില്‍ അശ്വിന്‍.പി. പ്രേമും ഒപ്പം ചേര്‍ന്നു.
പുതിയ പ്രതീക്ഷകളുമായി ജീവിത സായാഹ്നം ഫലപ്രദമായി വിനിയോഗിക്കുന്ന ഇവര്‍ തീര്‍ച്ചയായും സമൂഹത്തിന് മാതൃകയാണ്.
-സുധീര്‍ കൊരയങ്ങാട്
