കൊയിലാണ്ടി: നവരാത്രി മഹോത്സവത്തിനെത്തിയ ആന വിരണ്ടോടിയത് പരിഭ്രാന്തി പരത്തി. പൊയില്‍ക്കാവ് 
ദുര്‍ഗാദേവീക്ഷേത്രത്തിലേക്ക് നവരാത്രി എഴുന്നള്ളിപ്പിനായി കൊണ്ടുവരുകയായിരുന്ന ചിറക്കല്‍ പരമേശ്വരന്‍ എന്ന ആനയാണ് വിരണ്ടത്. വൈകീട്ട് ക്ഷേത്രത്തിലേക്ക് എഴുന്നള്ളിപ്പിനായി കൊണ്ടുവരവെ ആന അതിവേഗം ക്ഷേത്ര മുറ്റത്തേക്ക് ഓടുകയായിരുന്നു. ഇതേസമയം ക്ഷേത്രത്തില്‍ കേളിക്കൈ നടക്കുകയായിരുന്നു. മേളക്കാര്‍ ചിതറി ഓടി സുരക്ഷിത സ്ഥാനത്തേക്ക് മാറി. ഇതിനു പിന്നാലെ ആനയെ ക്ഷേത്രത്തിലെ തൂണില്‍ തളക്കുകയായിരുന്നു. മഴയായതിനാല്‍ കുറച്ച് ആളുകളേ ഉണ്ടായിരുന്നുള്ളൂ. അതിനാല്‍ വലിയ അപകടം വഴി മാറുകയായിരുന്നു. ഇതേ സമയത്ത് ബൈക്കില്‍ സഞ്ചരിച്ച ദമ്പതികള്‍ക്ക് 
ബൈക്ക് മറിഞ്ഞ് ചെറിയ പരിക്കേറ്റു. വിരണ്ട ആനയെ മാറ്റി പുതിയ ആനയെ എഴുന്നള്ളിക്കുമെന്ന് ക്ഷേത്ര ഭാരവാഹികള്‍ പറഞ്ഞു.
-സുധീര്‍ കൊരയങ്ങാട്
