വടകര: യുഡിഎഫ് പിന്തുണക്കുന്ന ആര്‍എംപിഐ സ്ഥാനാര്‍ഥി കെ.കെ.രമക്ക് ഫുട്‌ബോള്‍ ചിഹ്നം ലഭിച്ചില്ല. പകരം ടെലിവിഷന്‍ അനുവദിച്ചു. സ്വതന്ത്ര സ്ഥനാര്‍ഥികള്‍ക്ക് നല്‍കി വരുന്ന ചിഹ്നങ്ങളില്‍ നിന്ന് ഫുട്‌ബോള്‍ ഒഴിവാക്കപ്പെട്ടതിനാലാണ് കെ.കെ.രമയ്ക്ക് ഇത് 
അനുവദിക്കാതിരുന്നതെന്നാണ് വിവരം.
ഫുട്‌ബോള്‍ ചിഹ്നമാണ് പലപ്പോഴും ആര്‍എംപിഐക്ക് ലഭിച്ചിരുന്നത്. 2021ലെ തെരഞ്ഞെടുപ്പിലും ഇക്കഴിഞ്ഞ തദ്ദേശ തെരഞ്ഞെടുപ്പിലും ഫുട്‌ബോള്‍ ചിഹ്നത്തിലാണ് ആര്‍എംപിഐ മത്സരിച്ചത്. ഇതിന്റെ ചുവട് പിടിച്ച് ഇത്തവണയും കെ.കെ.രമ ഫുട്‌ബോള്‍ ചിഹ്നമെന്ന രൂപത്തിലാണ് പ്രചരണം തുടങ്ങിയത്. പ്രചരണ രംഗത്ത് ഫുട്‌ബോള്‍ ചിഹ്നവുമായി കെ.കെ.രമ സജീവമായി മുന്നേറുന്നതിനിടെയാണ് ചിഹ്നം നിഷേധിച്ച നടപടി.
ഇതില്‍ വിമര്‍ശനവുമായി ആര്‍എംപിഐ രംഗത്തെത്തി. നിയമസഭ തെരഞ്ഞെടുപ്പിലും 
തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിലും അനുവദിച്ച ചിഹ്നമാണ് ഫുട്‌ബോള്‍. അത് പ്രകാരം നിയമസഭയിലെ ഒരു പ്രത്യേക ബ്ലോക്കായാണ് ആര്‍എംപിഐ എംഎല്‍എ മുന്നോട്ടുപോയിരുന്നത്. നിരവധി തെരഞ്ഞെടുപ്പുകളില്‍ അനുവദിക്കപ്പെട്ട ഒരു ചിഹ്നം റദ്ദ് ചെയ്യുമ്പോള്‍ ജനാധിപത്യ വ്യവസ്ഥയില്‍ തങ്ങളെയും കേള്‍ക്കേണ്ട ബാധ്യതയുണ്ട്. എന്നാല്‍ ഏകപക്ഷീയമായി ചിഹ്നം റദ്ദ് ചെയ്തിരിക്കുകയാണ്.
ജനാധിപത്യവിരുദ്ധമായ ഈ നടപടിക്ക് പിന്നില്‍ രാഷ്ട്രീയ ഇടപെടലുകള്‍ ഉണ്ടായിട്ടുണ്ടോ എന്ന് സംശയമുണ്ട്. ഇതിനെ നിയമപരമായി നേരിടാനാണ് തീരുമാനിച്ചിട്ടുള്ളതെന്നും ഇലക്ഷന്‍ കമ്മീഷന്‍ നടപടി താല്‍ക്കാലികമായി അംഗീകരിച്ച് ടെലിവിഷന്‍ ചിഹ്നത്തില്‍ മത്സരത്തില്‍ ഉറച്ചുനിന്ന് മുന്നോട്ട് പോകുമെന്നും ആര്‍എംപിഐ സംസ്ഥാന സെക്രട്ടറി എന്‍.വേണു അറിയിച്ചു.
