നാദാപുരം: നാട്ടിന്‍പുറങ്ങളില്‍ അന്യമായിരുന്ന ചെണ്ടുമല്ലി ഇത്തവണ എങ്ങും സുലഭം. നൂറ് മേനി വിളവാണ് ലഭിക്കുന്നത്.
ചെക്യാട് പാട്ടോന്നുമ്മലില്‍ ഗ്രാമ പഞ്ചായത്തിന്റയും സംസ്ഥാന ഹോര്‍ട്ടികള്‍ച്ചറല്‍ മിഷന്‍ ലൂസ് കള്‍ട്ടിവേഷന്‍ ഫ്‌ളവറിന്റയും സഹായത്തോടെ കര്‍ഷക കൂട്ടായ്മ കൃഷിയിറക്കി നേട്ടം കൊയ്തു. വണ്‍ലൈഫ് ഓര്‍ഗാനിക് കാര്‍ഷിക കൂട്ടമാണ് കൃഷിയിറക്കിയത്.
ഓര്‍ഗാനിക്ക് കൃഷി രീതിയിലൂടെ ഒരു മാസം പ്രായമുള്ള ചെണ്ട് മല്ലി, വാടാര്‍ മല്ലി തുടങ്ങിയവയാണ് കൃഷിയിറക്കിയത്. 10 പേരടങ്ങുന്ന കാര്‍ഷിക കൂട്ടം കൃഷി വെല്ലുവിളിയായി സ്വീകരിച്ച് കുന്നിന്‍ ചെരുവില്‍ തന്നെ വിത്തിറക്കുകയും പൂവിരിയിച്ചപ്പോള്‍ മികച്ച വിളവ് തന്നെ ലഭിക്കുകയും ചെയ്തു. ചെക്യാട് ഗ്രാമ പഞ്ചായത്ത് പ്രസിഡന്റ് നസീമ കൊട്ടാരത്തില്‍,കൃഷി അസി. കെ. കെ.ഗ്രീഷ്മ, പി.കെ.സിന്‍സി, വി.പ്രജീഷ് കുമാര്‍, വി.കെ.അബൂബക്കര്‍, കെ.പി.ഖാലിദ്, ടി.രാമകൃഷ്ണന്‍, രാജന്‍, പി.പി.പ്രമോദ്, പി.രവീന്ദ്രന്‍, തൊടുവയില്‍ മഹമൂദ്, ഉസ്മാന്‍ ആയഞ്ചേരി തുടങ്ങിയവര്‍ സംബന്ധിച്ചു.
