കടുവ ഭീതി: വനം വകുപ്പ് ജാഗ്രത പുലര്‍ത്തണമെന്നു കോണ്‍ഗ്രസ്

വിലങ്ങാട്: പ്രകൃതിക്ഷോഭത്തിന്റെ മുറിവുണങ്ങാത്ത വിലങ്ങാട്ടെ ജനങ്ങള്‍ക്ക് വന്യ ജീവികളുടെ അക്രമത്തേയും ഭയക്കേണ്ട സാഹചര്യമാണ് വന്നിരിക്കുന്നതെന്നും ഇക്കാര്യത്തില്‍ വനം വകുപ്പ് ജാഗ്രത പുലര്‍ത്തണമെന്നും കോണ്‍ഗ്രസ് ആവശ്യപ്പെട്ടു.
കഴിഞ്ഞ കാലത്ത് കാട്ടാനകള്‍ ഇറങ്ങിയപ്പോള്‍ വനം വകുപ്പിന്റെ ഭാഗത്ത് നിന്ന് വേണ്ട രീതിയിലുള്ള ഇടപെടല്‍ നടക്കാത്തതിന്റെ തുടര്‍ച്ചയാണ് ഇന്നലെ വിലങ്ങാട് കടുവ ഇറങ്ങിയത്. വന്യ ജീവികള്‍ക്ക് വനത്തിനകത്തു പ്രകൃതി ദത്തമായി ലഭിച്ചുകൊണ്ടിരുന്ന ജലസ്രോതസ്സുകളും മറ്റും നശിച്ചു പോയതും ഫോറസ്റ്റിനോട് ചേര്‍ന്ന സ്വകാര്യ ഭൂമികള്‍ കാട് പിടിച്ച് കിടക്കുന്നതുമാണ് വന്യജീവികള്‍ നാട്ടിലേക്ക് ഇറങ്ങാന്‍ കാരണമാകുന്നത്. വനത്തിനകത്തുള്ള ജലസ്രോതസ്സുകളും മറ്റും സംരക്ഷിക്കാന്‍ വനം വകുപ്പ് തയ്യാറാകണം. വനാതിര്‍ത്തിയോട് ചേര്‍ന്ന് നിരീക്ഷണ ക്യാമറ സ്ഥാപിക്കണമെന്നും സ്ഥലം സന്ദര്‍ശിച്ച ബ്ലോക്ക് കോണ്‍ഗ്രസ്സ് പ്രസിഡന്റ് ജമാല്‍ കോരങ്കോട് ആവശ്യപ്പെട്ടു. എന്‍.കെ.മുത്തലിബ്, കെ.പി.ബിജു, യു.പി.ജയേഷ്, പഞ്ചായത്ത് വൈസ് പ്രസിഡന്റ് സെല്‍മ രാജു, എന്‍.വി.റിജേഷ്‌കുമാര്‍ എന്നിവരും സ്ഥലത്തെത്തി.